Боли глава

После шест години жестока пропаганда (а и пропагандата е работа, мили мои мрзеливци од кафулињата на улицата Македонија), Груевски успеа интелигенцијата на овој народ да ја сведе на интелигенцијата на бројлери: доволно е да им фрлаш по некое зрно пченица, да им викаш пи-пи-пи и да ги колеш кога ќе им дојде времето.

Зошто на некој јабанџија во Брисел или Вашингтон би му било важно во Македонија да има демократија, слободни медиуми и фер избори, ако нам тоа не ни е важно? Со кое право, во крајна линија, некој би се осмелил да го урива Груевски, кога на сите ни е добар? А што, велите дека не ни е добар на сите? Па ако не ни е, камо штрајкови, демонстрации, протести, камо илјадници луѓе на улици, камо храбри новинари кои разоткриваат корупциски скандали, камо храбри уметници кои пишуваат скандалозни романи, снимаат јуначки филмови и песни и го „естетизираат“ отпорот? Камо, бре, отпор?

Бранко Героски, „Фокус“, 11.05.12.

Во меѓувреме од кафулињата се слуша „туф-таф“ музика, младоста цути, сите носат темни очила и држат поза како божем по Вардар да тече џин-тоник, а не лајна собрани од Полог наваму. Секоја втора комуникација меѓу пријателите започнува со „слушам бетер ќе биде“. На улица Македонија бујрум да ја видите вистинската слика на еден (да го наречам ли) велеград. Од лево наидува топ-модел кој (да простите) не ебава ништо ни 2 отсто, а од десно доаѓа една „село моје лепше од Париза“. На средина една бабичка влече за ракави минувачи барајќи пари за лекот кој го пишува на рецептот со кој мавта. Во воздухот мириса латентен немир. Насмевката блеска насекаде, а сите свесни дека зад неа стои врисок. Македонија, лето богово две илјади дванаесетто, Ризус Сардоникус!

Агим Јонуз, „Дневник“, 09.05.12.

Ти не си глупав човек, Латас, ама претеруваш човече... Зошто, друже, не тргнеш како треба – од позицијата дека и ТИ си истрошено дете на транзицијата како и Бранко и Ѕинго... Ајде, кажи го тоа! Родител во средни години си ти... Мислиш ли ти на иднината на своите деца? Па не е сè во кешот, пријателе!

Љупчо Зиков му пишува писмо на Латас; „Капитал“, 02.05.12.

Пред една година ја добивме битката на Калето и историјата ќе суди за инцидентите што се случија таму.

Артан Груби, десната рака на Али Ахмети; „24Вести“, 23.04.12.

Кога само ќе го ставите прстот во Дунав, вие сте поврзани со целиот свет.

Борис Тадиќ, во предизборна кампања ги теши граѓаните на Велико Градиште, една од најсиромашните општини во Србија; „Танјуг“, 19.04.12.

Сето тоа укажува дека овој злостор, како и сите други, е можен само од – атеисти. Души полни плевел. Луѓе што веруваат дека тие го создале светот. Повторувам – тој податок за истрагата не значи ништо, но многу значи за нашиот степен на култивирано сфаќање на религијата. Вистински верник не би го сторил тоа што се случи на Величетврток. Затоа, јас сум доста резервиран кон оние што станаа против веронауката како изборен предмет во училиштата.

Венко Андоновски, „Нова Македонија“, 18.04.12.