Боли глава

Никој не може да ме убеди дека непризнавањето на бугарско малцинство во земјава за сметка на полно ЕУ членство е цена што вреди да се плати и дека обичниот граѓанин се согласува со тоа.

ВМРО не претставува никого. Левица претставува млади кои оваа позиција ја гледаат како анти-империјалистичка; и во ЕУ има евроскептична радикална Левица. Затоа нив ги оставам на страна, барем некого автентично претставуваат. Мицковски не го претставува просечниот човек. Не ми ги цитирајте манипулативно изведените – а некои и апла фејк – анкети.

Конечно, секому и со IQ под 90 му е јасно дека признавањето на бугарско малцинство значи разлика од македонското мнозинство. Ова противење не е мотивирано од патриотизам туку заднински олигархиски интереси.

Катерина Колозова, Фејсбук, 14.06.23.

Трн: За 10 години од сега каде се гледате, кои предизвици ви стојат?

Славчо Димитров: Проекцијата на иднина за 10 години е привилегија на богатите хетеронормативни луѓе, којашто не можам да си ја дозволам.

Славчо Димитров, trn.mk, 12.06.23.

Судски совет „се распадна” кога на дневен ред дојде да се дискутира за одговорност за апелациски судија кој развлекуваше постапка против политички моќник. Очигледен е партискиот отпечаток во работата на судскиот совет.

Ако партиите имаат значително влијание врз судството, како ветинг којшто тие ќе го пропишат може да го реши проблемот со судството?!

Напротив, оној што има дадено предлог закон за ветинг има намера да воспостави уште поголема контрола врз судството. Просто ко пасуљ.

Миша Поповиќ, Фејсбук, 06.06.23.

Нивото на цивилизациски развој на 95% од народов е = Адам од Говрлево.

Искра Спарк, Фејсбук, 01.06.23.

Знаете ли, бе, што е најголемиот пораз, срам и унижение за оваа држава, овој народ и цела една нација? Се крие во реченицата на универзитетскиот професор по политички студии од универзитетот Синсинати во САД, по баба кукушанецот, Бугаринот Иван Динев Иванов, кој на дебата на една национална телевизија со еден наш познат политички аналитичар му го кажа следниот статистички податок:

„По распадот на комунистичкиот лагер во цела Источна Европа, вие (Македонија) имавте 1,8:1 повисок бруто домашен производ по глава на жител во однос на нас (Бугарија). Денес ние (Бугарија), по повеќе од триесет години имаме двојно поголем (2:1) бруто домашен производ по глава на жител од вас (Македонија)“.

За три децении на општествениот, економскиот и животностандарниот развој, нашите мили источни соседи Бугарите, не само што нè престигнале, туку и нè претркале во развојот и сега, по сите официјални светски параметри,  се двојно побогати од нас како нација/граѓани.

Благојче Атанасоски, Слободен печат / Окно, 12.05.23.

Пораката од институциите до мене е јасна: мојот живот и животот на трансродовите лица не е подеднакво вреден за заштита. Со законот (за матична евиденција) се овозможува да се сменат личните документи кои го засегаат само лицето кое ги поседува и институциите пред кои ги приложува. Никој не ми бара лична карта за да влезам во женско веце. И сега со М во лична карта влегувам ви женско веце и ништо од тоа што го предвидуваат противниците не се случи, не се распадна семејството, не се распадна општеството.

Трансродовите луѓе во оваа земја менуваат документи, постапки кои се провизорни и можат да траат до 10 години. Со овој закон, наместо да ни се менуваат документите со одлука на Европскиот суд за човекови права, ќе се менуваат со одлука на Управата за матична евиденција. Наместо да се менуваат за една деценија, ќе се менуваат за еден месец. За трансродовите луѓе ова значи многу, значи дека нема да изгубиме 10 години од животот кои оставаат трајни последици; значи дека ќе можеме да си најдеме работа, да не бидеме социјални случаи, да не ни страда здравјето поради стравот и анксиозноста на секое одење во банка или на граница.

За разлика од нас, овие документи ништо не им значат на останатите граѓани. До сега околу 14 трансродови луѓе ја смениле ознаката за пол и матичниот број, па ете, не дојде до тој крај на светот како што предвидуваат противниците.

Лила Митиќ, во Собранието на РСМ, 17.05.23.