Да го следиме примерот од БиХ

Ние, Движењето за социјална правда „Ленка“, Левичарското движење „Солидарност“ и други левичарски иницијативи, ги поддржуваме случувањата во Босна како и пошироко на Балканот, во сите нивни акции и барања како и во начинот на којшто го изразуваат незадоволството.

Ги осудуваме сите медиуми кои сакаат да фрлат црна дамка на овие пролетни цутови во социјалното будење на обесправените работни и безимотни маси. И апелираме до обичните граѓани да ги игнорираат истите.

Солидаризирајќи се со нашите другари, ја повикуваме работничката класа и безимотните маси од нашата држава да го следат примерот на нивните другари од Босна како и од регионот и да излезат на улиците да им стават крај на овие неправди.

Ако се чувствуваш обесправен! Ако се чувствуваш искористен, излажан, експлоатиран, изманипулиран, ограбен, изрази го својот револт!

ЛД Солидарност и ДСП Ленка, во име на оваа обесправена класа го отфрламе лажниот социјален дијалог и повикуваме на социјална борба. Ја отфрламе егоистичката индивидуалност и себичноста и залагајќи се за заедништво и солидарност, кажуваме не на натпреварот, алчноста и конкурентноста, а да за кооперацијата и самоуправувањето. Застануваме против приватната сопственост залагајќи се за колективна општествена сопственост на средствата за производство како и фер и еднаква распределба на производите создадени во рамките на овие заеднички општествени капацитети.

Конечно и најважно, повикуваме на надминување на етничките разлики и поделби и изградба на класна свест наспроти доминантната национална која мора да ја отфрлиме. Примерот на Босна и Херцеговина докажува дека етничката и националистичка омраза мора да се надминат за да се оствари социјална правда и хумано општество!

БОРБАТА Е ТВОЈА, ПРИКЛУЧИ СЕ!!!

Извор: solidarnostblog.wordpress.com