Зошто е добро да живееш во Македонија?

Во Македонија законот се грижи за твоето здравје. Toj те штити од чадот на цигарите на затворено ширум земјата.

На улица, пак, издувните гасови од старите автомобили, рафинерии и топилници треба само да те потсетат колку е добро тоа што можеш да пиеш кафе или да јадеш без ентериерно да те гушат некакви чадови и смрадови. Останува да се усвои само уште еден закон кој ќе ја заокружи оваа супер-заштитничка про-етичка легислатива, а тоа е строга забрана и казни за телесните издувни гасови во затворени простории. Потребно е да се обучат специјални инспекторски тимови од нашите институции кои орно ќе ги крстосуваат домашните јавни и угостителски објекти, ќе ги регистрираат овие прекршители и ќе ги санкционираат сите оние безобразници кои си допуштаат бесправно да испуштаат.

Во Македонија (ќе) има повеќе споменици и скулптури пер капита од Велигденските острови

Македонија, здравје Боже, еден ден ќе стане престижна туристичка локација, од рангот на Велигденските острови, каде луѓето од цел свет ќе доаѓаат да се изначудуваат и восхитуваат на илјадниците споменици, скулптури и статуи распослани ширум оваа убава земја. Туристичките водичи инспирирано ќе им објаснуваат на светските добронамерници како оваа изумрена цивилизација од уста двоела, среде транзиции и светски кризи, за споменици и други скаменети творби сè со цел да стане нешто што ќе остане во времето и ќе сведочи за нејзиниот непокор спрема клетите комшии и другите белосветски клеро-фашистички душмани.

Во Македонија ќе се изгради аеродром кој за два века историчарите од земјава ќе го прогласат за најстар аеродром во светот

Откако компанијата ТАФ негде накај 2020 конечно ќе го изгради аеродромот Александар велики и легално ќе го преименува во Султан паша османлиски, домашните историчари за некои два века епохално ќе откријат дека овој аеродром всушност е најстариот аеродром на тлото на Европа изграден уште за време на турското ропство. Во прилог на тоа ќе биде откриена древна табла со натписот „Macedonia - the first wireless country in the world“ (Македонија, прва бежична земја во светот) со што аргументирано ќе биде разоткриено дека Македонија била прва земја со бежичен интернет во светот, кој бил користен уште од крајот на XIX век. Како крунски историско-археолошки доказ за постоењето на првиот аеродром ќе послужи антологиската песна на Константин Миладинов, Т'га за југ. Низ стиховите на овој гениј (Орелски крилја как да си метнех и в наши ст'рни да си прелетнех!) ќе се потврди дека не само што имало аеродром во Скопје, туку дека такви имало и во Охрид и Струга (Дајте ми крилја ја да си метнам и в наши ст'рни да си прелетнам: на наши места ја да си идам, да видам Охрид, Струга да видам).

Македонија е социјална држава

Убаво е да се живее во Македонија. Тоа е земја која се грижи за своите граѓани со тоа што во неа функционира извонреден и напреден систем за социјална заштита и згрижување на граѓаните. Тој систем за социјална заштита е прилично уникатен и главно функционира на следниов начин: ако имате некаков проблем со финансиите и плаќањето сметки, одите во најблиската банка, менувачница или кладилница и си земате пари колку сакате. Да, си земате колку си сакате, или колку ќе се задеси да има во самата банка, кладилница или слично. Вработените таму сесрдно ќе ви ја испразнат касата и ќе ви посакаат сè најдобро. Социјалните случаи своите средства ги подигаат, наместо со картичка и лична карта, со маска и некој пластичен пиштол од нивните внучиња купен на Бит пазар. Маската служи за овие социјални случаи да не бидат стигматизирани од општеството и за да биде заштитен нивниот идентитет. Активен дел од оваа социјална програма е и полицијата која уредно доаѓа пост-фестум и се грижи обичните клиенти по банките, кладилниците и менувачниците, да не креваат многу врева, бидејќи социјалните случаи секогаш имаат предност и не чекаат ред.

Македонија е земја во која можеш да си купиш најевтина диплома во Европа

Македонија е Мека и за образованието: во неа речиси за ич пари можеш да си купиш извонредно евтина диплома за сите можни науки и специјалности. Извонредна палета дипломи, од најразлични струки, профили и анфаси, и што е уште поневеројатно, по Болоњски стандарди и по кредит трансфер систем! Навистина неверојатно! Ова кредит трансфер систем, инаку, доаѓа оттаму што родителите на студентите подигаат кредит од банка, и веднаш вршат трансфер на личните сметки на професорите и со тоа значително го катализираат образовниот процес. И додека во Америка и Британија мора да одвоите некои 20.000 долари или десетици илјади фунти за образованието на вашето дете, во Македонија тоа можете да го направите со некои „бедни“ 4-5 илјади евра. Па каде го има тоа?

Слики: Marion Peck