ѕверовите ја сакаат татковината

Ѕверовите ја сакаат татковината
ѕверовите се вистински ослободители
   ненадминати револуционери
ѕверовите ја пролеваат и последната капка крв
   за татковината
ѕверовите врескаат до засипнатост во име на татковината
(песот се плаши дека месечината ќе му ја заземе татковината
затоа лае по неа!)
поради татковината
   ѕверовите те гребат, ти забиваат канџи
   ти го распоруваат грлото
   ако не си го понел знамето
   не ти гине мртовечки покров
ѕверовите крвта ти ја исцицуваат ако не си построен
   во вистинскиот ров
штом војната ќе избие ѕверовите ги дигаат во воздух
   моралот правото совеста
ѕверовите знаат дека господ ќе им прости
    сè што ќе направат
ѕверовите ја сакаат татковината и ѝ служат верно
ѕверовите се свети ослободители
затоа за награда ја бараат сета власт
    и целото богатство

Препев: П. В.

Арбен Идризи (Arben Idrizi, 1974), косовски поет. Објавил две стихозбирки, Страдалници (2003) и Книга на битието (2010). Преведува од италијански. Работи како уредник во дневниот весник Express. Живее во Приштина.