1007 hPa
77 %
13 °C
Скопје - Чет, 25.04.2024 11:59
Во понеделникот модерирав трибина во театарот „Максим Горки“ која ја пренесуваше Првата програма на Радио Берлин. Гостинка ми беше поранешната главна бискупка на евангелистичката црква во Германија Маргот Кесман, а разговаравме за политизацијата на религијата. Кога ја споменавме забраната за носење бурки, госпоѓата Кесман рече дека според нејзиното мислење бурката е репресивен инструмент за поробување на жените, но дека е против забраната за носење бурки во јавноста.
Публиката реагираше бурно на тоа со извици „Лицемери“. Двата реда публика станаа со транспаренти и стегнати тупаници извикувајќи пароли. Тоа се пристојни млади луѓе: уредно ги кренаа плакатите – дури и викаа некако пристојно. Кога ги замолив да ја напуштат салата, тоа го направија без приговор. Ви ги претставувам нашите нови нацисти: припадниците на движењето Идентитет. По потекло од Франција, ги има во Австрија, а од неодамна постојат и во Германија.
Претседателот на службата за заштита на уставот Ханс-Георг Масен, пред неколку години ја нарече оваа група „виртуелна појава на екстремната десница“ со „засега незначително упориште во реалноста“. Тоа се промени: во тек е десничарска револуција со растечки број учесници. Берт Брехт во песната „Телешки марш“ вели: „Носат свастики/ на крвави знамиња/ со кука за секој бедник“. Следбениците на Идентитет имаат своја свастика: црната грчка буква Ламбда на жолта позадина. Ја преземаа од филмот 300 – The Battle of Thermopylae. Тоа е знакот кој во овој филм на штитовите го носат Спартанците во војната со освојувачите од истокот. Старите нацисти својот крст го позајмиле од старата митологија, а новите – од Холивуд. Тие ги презираат глобализацијата и американизацијата, но изгледа поп културата им е слаба точка.
Маргот Кесман и јас не сме случајни мети на нивните акции. На десничарските форуми пишува дека Кесман и Аугштајн „заговараат општество на имиграција“ и подготвуваат „голема размена на народи“, кога чистиот германски народ ќе биде заменет со валкан, измешан. Следбениците на ова движење ги нареков нацисти сосема свесен дека тоа е збор кој треба внимателно да се употребува. Не се нацисти сите кои имаат поинакво мислење од моето, но во овој случај се. Тие не заговараат освојувачки војни и истребување на Евреите. Својата идеологија ја нарекуваат етно-плурализам: секој народ има право на свој простор, на кој треба и да остане. Глобализацијата, миграцијата и мултикултуралноста се само дел од многуте лица на ѓаволот.
Употребата на зборот „простор“ ги повикува Мартин Хајдегер и Карл Шмит, хероите на секоја десница. Следбениците на Идентитет се млади луѓе, но нивното мислење е старо. Тоа е група млади старци кои сонуваат за модерен фашизам по примерот на денешна Русија и Унгарија. Кога се меѓу своите, во весниците, на интернет, на состаноците што ги организираат нивните имотни донатори, им се препуштаат на старите фантазии за моќта, визиите на „реконквистите“ и ослободувањето на Германија од исламот и левиот мејнстрим. Најпосле, сè се сведува на исклучување на противникот, а пред сè на гаснење на независните медиуми.
Не сум сигурен дали е комплимент да се биде дел од нивните планови. Припадникот на огранокот на Идентитет, Мартин Селнер напиша есеј за стратегијата на движењето: новинарите, кои ги нарекува „камарила“, мора „да бидат оддалечени од своите нелегитимни и недемократски позиции. Нема попуштање, промена на мислењето или помирување. Сè додека тие со својата самоубиствена агенда и автошовинизмот управуваат со „демократскиот центар“, консензусот во врска со „големата размена“ е незамислив. Сè додека Аугштајн пишува во Шпигел, германската и европската иднина се неизвесни.“
Во понеделникот вечерта во „Максим Горки“ новите нацисти го покажаа своето вистинско лице: младо, избричено и студено. Ги прашав зошто нè нарекуваат „лицемери“ и што сакаат од нас? Не ми одговорија. Тука не е проблем формата на протестот, туку неговата содржина. И не ми влеваат страв нивните повици, туку одбивањето секаков разговор. Бараа јавноста да ги слушне и тоа и го добија. Дали им помагаме со тоа што известуваме за нив? Да. Дали би било подобро да молчиме? Не.
15.09.2016
Извор: http://www.spiegel.de