„Федерализација“ спакувана во „куртон вести“

07.12.2016 02:17
„Федерализација“ спакувана во „куртон вести“

Медиумскиот началник, кој со брзина невидена во академските кругови се здоби со научното звање „професор доктор“, човекот кој за 24 часа доби „пемпеле“ од полицијата на Јанкуловска дека не е соработник на тајните служби, пријателот на балканскиот сатрап Милошевиќ кој беше во толпата што се обиде да ја запали американската амбасада во 1999-та, човекот кој повеќе од 20 години блуе отров кон политички, верски и етнички различните, вчера се огласи преку уредничкиот коментар на „куртон вестите“ на неговата телевизија, со уште една тирада на омраза и поттикнување на меѓуетничка нетолеранција, спакувана во коментар кој ги посочува „ризиците од двојазичноста во Македонија“.

Началникот професор – доктор уредник Лаки, или „скапата курва“ како што за себе своевремено изјави во ТВ емисијата на неговиот следбеник и сегашен вработен Јанко Илковски, во стил својствен на епитетот што си го даде сам на себе, ја затскри својата омраза зад флоскулата „уреднички коментар“.

Итар е медиумскиот началник, знае дека на тој начин, бидејќи барем формално не се работи за информативна содржина туку за жанр кој изразува личен став, не го фаќа законот, ниту пак методологијата со која ад-хок медиумската комисија ги оценува телевизиските вести и прилози. Тој, исто така, многу добро знае дека во сегашните медиумски закони нема санкција за говор на омраза (за што силно лобираше кај своите газди, а богами и јавно, кога се менуваа медиумските закони пред 2-3 години), како и дека во Македонија, во целата нејзина историја како самостојна држава, сè уште нема ниту осуден човек за говор на омраза според Кривичниот законик.

А што имаше во уредничкиот коментар на „куртон вестите“ на медиумскиот началник? Еден куп бројки и статистики без извор, кои посочуваат дека двојазичноста ќе ја чини Македонија 50 милиони евра, дека илјадници етнички Македонци ќе изгубат работни места во администрацијата, образованието, здравството, а ќе се вработуваат илјадници нови Албанци…

Шарената лага – коментарот на вестите на медиумскиот началник кулминира со бројката од над 70.000 Албанци, кои ќе се преселат во источниот дел на Македонија и ќе ја сменат етничката карта на населените места. Додека одат овие зборови, во прилогот се гледа исцртување на анимација со мапата на Македонија и три големи стрелки кои се движат од западот кон истокот на земјата, претставувајќи ја „наездата“ на Албанците. И сето тоа, без ниту еден извор, без ниту еден факт, но скриено зад флоскулите „уреднички коментар“, „експертите велат“ и спакувано во бројки, графикони и анимации за да изгледа ем страшно, ем уверливо.

Не само што можеме да претпоставиме, туку можеме со сигурност да речеме дека знаеме од каде доаѓа идејата и нарачката за овој најнов „новинарски“ потфат на началник Лаки. Па, слушнавме во „бомбите“ како одат тие работи!

Финалниот удар на пропагандата на МВРО и успешно наметнатата лажна тема за „федерализација“ во оваа изборна кампања треба да се испорача преку најгледаните „куртон вести“ во земјава. И тоа, од кого? Од истиот човек, кој во 2001, додека беше во нечија друга служба, преку медиумите што ги уредува, ја поддржа тогашната идеја на некои кругови во МАНУ и на неговите тогашни политички мецени за поделба на Македонија. Е, токму тој, сега ќе ја спасува Македонија од федерализација и двојазичност.

На 11-ти декември, граѓаните ќе стојат исправени пред уште еден избор: дали ќе се стави крај, или со нашата јавност уште долго време ќе царуваат медиумските началници? Дали оние кои во „куртон-вести“ пакуваат теми и информации според желбите на оние кои го создадоа „Монструм“, Кале, Куманово, тепачките по автобуси, според агендата на оние кои ни ги поделија училиштата, зградите во администрација, улиците, кафулињата, градовите, ќе продолжат да нè лажат, дезинформираат, делат, да нè крват меѓу себе и разнебитуваат? Или, конечно, ќе престанеме да ја сркаме нивната смрдена, бајата и по сто пати подгреана чорба на национализмот и фашизмот ?

Извор: civil.org.mk
Слики: Свирачиња

Слични содржини

ОкоБоли главаВицФото