Боли глава

Секој ден си велам ова е дното, не може полошо, ама оптмистот ми вели може. И во право е.  Ова нема врска со власта, ама има со сите власти. И нема врска со мојата струка.

Денес на вести ЈП Комуналец Гостивар изјавува: „Швајцарскиот грант од седум милиони евра е блокиран зашто ЈП Патишта (централна власт) уште не ни издало, а минаа 2 години, одобрение за поставување цевка во должина од 600 метри.“

ЈП Патишта одговара: „Во фебруари 2024 поднесено е барањето, точно е, изготвен е одговор, но истиот не е доставен до ЈП Комуналец, бидејќи тие веќе две години не ја платиле фактурата за оваа услуга во износ од 16.500 денари.“

Крај. Во овој период се сменила и централната и локалната власт. Заклучувам: За 250 евра закочен е проектот од 7 милиони евра,а епидемијата ќе беше избегната, Гостивар ќе имаше чиста вода под притисок. За 250 бирократски евра страда цел град, илјадници судбини, а трошоците се многу поголеми од 7 милиони евра.

Неверојатно, но вистинито. Кој не верува, нека гледа вести, на Телма и МРТ гледав, а веројатно и на другите телевизии.

Никола Пановски, 27.07.26.

Среќната околност при хаотичните движења на ветровите е што тие удираат во случајни тесни подрачја и ќе закачат случајни покриви кои не се правилно закачени за конструкцијата.

Закачувањето е една толку едноставна и стара операција што ја правеа дунџери и ѕидари од пред повеќе од еден век, а камоли во поново време. Кога ние одевме по градилишта, да го учиме занаетот како млади архитекти, гледавме дека со текот на времето почна да се одбегнува закачувањето на покривите на конструкцијата, со сосема неодговорна и плиткоумна мисла дека самата негова тежина го држи покривот.

Кога зборуваме за вакви силни ветрови од 130 км на час, секој нормално и школски закачен покрив на бетонската конструкција може да издржи било какво невреме. Како што се менуваат климатските промени така, уште од проектната фаза, треба да се освежуваат и апдејтираат стандардите за силината на ветрот на која треба да се смета.

Мирослав Грчев, „Локално“, 22.07.26.

Никогаш досега не сме гледале вакво финале на Светското првенство, а тешко дека некогаш повторно ќе видиме нешто слично. Никогаш досега не се случило една екипа целосно да го неутрализира својот противник, не дозволувајќи му буквално ништо – ниту една вистинска шанса, ниту барем донекаде опасна ситуација, па дури ни еден единствен удар кон голот. Токму тоа Шпанија вечерва ѝ го направи на Аргентина, и тоа не само во текот на 90, туку и во 115 минути од натпреварот.

Александар Холига, Телеграм.хр, 20.07.26.

Социјалдемократите и демохристијаните заедно сметаат дека правото на сопственост и на градење на Водно е поважно од правото на граѓаните да бидат безбедни од тоа Водно да не им се сруши на глава.

Двете најголеми партии (без поединци) си го изгласаа Нацрт-ДУПот за Барутана со кој на подрачје на Водно кое е означено како подрачје под влијание на ерозија се планира изградба на уште 25 големи објекти од кои 24 се приватни куќи - хациенди.

Советниците на Шанса за Центар, Левица и ЗНАМ и уште двајца поединци од големите партии беа против ваквото искористување на падините и шумите на Водно.
Ако Галите во стрипот „Астерикс и Обеликс“ се плашеа „небото да не им падне на глава“, скопјани и особено центарци, треба веќе да се плашат Водно да не им падне на глава.

Не може да се задоволи огромниот апетит за разјадување на шумата на планината која треба да го штити градот од поројни поплави и лизгање на земјиште.

„Шанса за Центар“, Совет на Град Скопје, 15.07.26.

Агенцијата за заштита на правото за слободен пристап до информации од јавен карактер, упорно, на секоја поднесена жалба, известува дека за да ја прифатат и да постапуваат треба да се завери со електронски потпис.

Значи, секој граѓанин ако сака да поднесе жалба мора да има електронски потпис, или треба да плаќа поштарина и да ја прати по пошта. По меил не прифаќаат, затоа што така им наложил управниот инспекторат.

Дали граѓаните треба да се изложуваат на трошок и да обезбедуваат електронски потпис за да комуницираат со Агенцијата, која функционира со пари на граѓаните?Дополнително што Законот за општа управна постапка, се однесува на акти т.е. исправи, а не на поднесоци.

Особено што според Законот за електронски документи, електронска идентификација и доверливи услуги, во делот верификација на печатена форма на електронски документ, пишува дека електронскиот документ репродуциран на кој било печатен медиум ја има истата правна и доказна сила како оригиналниот електронски документ.

Каков правен волунтаризам.

Васко Маглешов, Фејсбук, 07.07.26.

Ја гледав снимката безброј пати и уште не разбирам како некој можеше да пресуди офсајд. Ако поништите гол што може да ја одлучи судбината на еден тим на Светското првенство, мора да бидете стопроцентно сигурни, а не да нагаѓате зад монитор. Милиони Иранци славеа историски момент, а потоа група службени лица им одзедоа сè за неколку секунди. Не само што поништивте гол - го украдовте сонот на една нација.

Не можете да се криете зад технологијата кога се користи на погрешен начин. Ова не е правда, ова е некомпетентност. Светското првенство се игра еднаш на секои четири години. Играчите жртвуваат сè за да стигнат до тука, навивачите доаѓаат од целиот свет, а потоа една шокантна одлука уништува месеци работа. Тоа е неоправдано.

Златан Ибрахимовиќ, 26.06.26.