Боли глава

Најужасно ми е што еден очигледно безмилосен убиец на деца се обидува да се извади со некои квази патриотски алибија и со заматување вода раскажувајќи заверашки приказни и испраќајќи пораки до милионери и милијардери.

Во исто време луѓе од партијата на овој ѕвер, напаѓаат луѓе, политичари, невладини, зад некаква наводна заштита на децата, шират завери против вакцинација, промовираат отворено насилство, дискриминација и нетолеранција, додека властите со своето молчење или помагање стануваат соучесници на ова зло.

Патем се гледа и враќањето на злото на режимските мегафони кои имаат функција да дефокусират и да шират омраза и поделби.

Овде секоја будала со зли и себични, користољубиви и партиски интереси, успева да добие на гласност и поддршка од властите.

Навистина не учиме ништо од минатото и од грешките.

Ивор Мицковски, Фејсбук, 14.04.25.

Бев на протестот на Кој е следен? Бев и како репортер, ама повеќето време си одев како поддржувач, заедно со луѓето во колоните. Има народ искрен и жеден за правда и системски промени. Немојте да грешите душа и да ги клеветите овие млади девојки и дечки. Не подлегнувајте на пропагандата. Власта тоа вешто и подмолно го прави преку платени ботови, и платени медиуми. Го прави тоа популистички и преку експлоатирање на маките на луѓе во жалост.

Не ја убивајте последната надеж за ова општество.

Јане Ѓорѓиоски, Фејсбук, 11.04.25.

Постојат точно наведени критериуми за тоа какви мораат да бидат објектите кои се користат како ноќни клубови. Треба да бидат механички стабилни, значи носиви, стабилни, отпорни на земјотрес и на пожарно дејство, а секако да имаат и санитарно-технички услови. Пожарното дејство е точно наведено; дефинирано е дека за да бидат отпорни на пожарно дејство во нив треба да бидат вградени материјали отпорни на пожар и кои не горат. Сунѓер и стиропор не само што лесно горат, туку предизвикуваат огромна густина чад при што се испушта и цијанид, односно киселина на цијанид; знаеме тој цијанид, еден од најстрашните отрови за човекот, каде и како се користел во минатото.

Ова е доказ на тезата дека нашиов систем буквално си ги уби своите деца, оние што не успеа да ги истера надвор од државата. Тој почна да ни ги убива децата, и сведоци сме дека такви случаи во последниов период има многу.

Горан Марковски, декан на Градежниот факултет; „Бизнис 21“ на ТВ „21“, 26.03.25.

И партиските вработувања се корупција, зашто најчесто се вработува партиски послушник наместо способен неопределен кадар, или способен но од друга партија (меритократија).

Партиските вработувања можеби се и коренот на повеќето зла во Македонија. Овде имаме стотици илјади корисници на таа корупција, но нам тоа ни е комплетно нормализирано, за жал, и никој не се прашува за ефектот од тоа.

Душан Стојчев, Фејсбук, 27.03.25.

Од досегашниот правец на истрагата и информациите кои се соопштени во јавноста, СДСМ стравува дека оваа истрага ќе биде селективна. Откако министерот Тошковски извести дека првата фаза од истрагата е завршена и се сомничат 32 лица, денес тој и обвинителот Коцевски мора да одговорат на следните легитимни прашања кои се наметнуваат. Дали е точно дека:

- Ниеден од командирите, инспекторите, и раководството на БЈБ и МВР во ОВР Кочани и СВР Штип, кои мора да знаеле што се случува, не се во притвор?

- Дали и против кој од нив се води истрага? И ако не се води, како е можно да не се истражуваат лица кои вечерта биле на одговорни позиции, со должност и овластување да реагираат – но не го сториле тоа?

Мартин Костовски, организациски секретар на СДСМ; на прес-конференција, 24.03.25.

Иако претставниците на власта декларативно повикуваат на „сплотување“ и надминување на разликите, деновиве сè почести се обидите да се оцрни, замолчи и задуши критиката и револтот на граѓаните за трагедијата во Кочани.

Поддржувачите на власта во медиумите и на социјалните мрежи повторно водат оркестрирани хајки против студентите и граѓанските инцијативи што најавуваат собири и протести.

Повторно се „спружуваат“ медиуми, новинари, граѓански организации и активисти, повторно се прогласува за „шарен“, „платеник“ и „предавник“ - секој што ја критикува истрагата за трагедијата и постапките на „безгрешната“ власт, која бара одговорност секаде, но најмалку во сопствените редови.

Овие јалови обиди за бегство од сопствената одговорност не носат ниту сплотување, ниту обединување на целата земја за „промена на системот“. Тие многу повеќе потсетуваат на темните времиња на Груевски и „заробената држава“.

Петрит Сарачини, Фејсбук, 22.03.25.