Боли глава

Доколку се урнеме некаде и доколку починеме, тогаш претпоставувам дека ќе им стане јасно на сите дека оваа дебата за некоја идна влада и за некои идни премиери е одвишок и дека е беспредметна.

Христијан Мицкоски на прес конференција; СДК, 18.02.26.

Кога и да отворам социјални мрежи ќе ми се појават Видиноски, човекот на годината, деценијата, векот бре, кој прави кариера шетајќи по улици и снимајќи кај има ѓубре. Оној адвокатот со просек 6 на факултет, значи едвај што завршил, Јанаки, чие мислење е релевантно очигледно. Боки 13 и цела серија крајно исфеминизирани геј типови, фризери, шминкери, кои се главни забављачи со одвратни поткасти, Игор Џамбазов со мрсната коса кој тера вечито одмори по селата, Тони Михајловски со она гровтање од смеење, неколку женички кои прават досадни поткасти со фолкерки, некој Бомбакис со глупостите пишани на картон, оној ужасниот тропач на безвесни вицови Бојан што пресадил коса, кој е интересен нормално на IQ 81, ина многуфина која нема фаца. Некоја што пишува на фб.
Скоро ништо во оваа средина не ми е ни убаво, ни симпатично, ни паметно, ни креативно. Мочвара.

Томислав Каранфиловски, Фејсбук, 08.02.26.

Јануари е и зима е, и неколку луѓе што ги знам се преселија на оној свет. Ми се чини дека луѓето најмногу умираат ова време од годината. Среде зима или среде лето, кога е најстудено и најтопло. Починаа Васе Рингов, Драган Б. Костиќ, Зоки Панкер и Мижи. Бог да ги прости и лесна им земја.

Има денови кога и мене ми доаѓа да кренам раце и да оставам сѐ. Да ги спуштам ролетните, да ги навлечам завесите и да си легнам. Поразен. Така, во темница и зад затворени врати се вежбаме за времето што ќе го поминеме в гроб. Мислиме дека душата не го напушта телото со умирањето, инаку зошто би оделе на гробишта и би палеле свеќи над нечии останки што гнијат? Оваа морбидна гимнастика е oпштоприсутна во животот на секој што бил длабоко разочаран барем еднаш, а има ли таков што не бил? Се надеваме дека спиењето ќе ја избрише тежината што нѐ притиска, и тоа е надеж во преродба, или воскресение. Во обновено постоење со реновиран дух и варосани ѕидови што светат. Секое заспивање е мала смрт, и секој кревет е ковчег без капак, и тоа не е ништо страшно.

Тихомир Јанчовски, Економија и бизнис, 01.02.26.

Во град - до 10km/h - 15 евра, од 10km/h-30km/h - 50 евра.
Ако треба да се вози 50 ти возиш 80 и казна 50 евра, 3,000 денари. Со 80 можеш да оставиш некого на место, ама ОК, 3,000 денари, ќе си возиш ќе си платиш, ќе ги прежалиш. Каква генијална логика.

На автопат - до 30km/h казна 20 евра. Треба да се вози 80, ти возиш 110, 1,200 денари, ништо страшно. Од 30-50km/h над дозволеното казна 50 евра. Треба да се вози 100, ти возиш 150, 3,000 денари, чиста работа, ќе ги платиш.

Александар Маџаровски, Фејсбук, 28.01.26.

Убиствата на невооружени цивили на улиците на Минеаполис, вклучително и денешното убиство на медицинската сестра од интензивна нега Алекс Џефри Прети, не би биле шок за Ирачаните во Фалуџа или за Авганистанците во покраината Хелманд. Тие со децении беа тероризирани од тешко вооружени американски егзекуциски одреди. Ова не би било шок ниту за ниту еден од студентите на кои им предавам во затвор. Милитаризираната полиција во сиромашните урбани населби крши врати без налози и убива со истата неказнивост и недостаток на одговорност.

Она со што сега се соочуваме ние останатите Еме Сезер го нарече империјален бумеранг. Империите, кога пропаѓаат, ги применуваат дивјачките форми на контрола врз оние што ги потчинуваат во странство, или врз оние што поширокото општество ги демонизира во името на законот и редот, на домашен терен. Тиранијата што Атина ја наметна врз другите, забележал Тукидид, на крајот, со распадот на атинската демократија, си ја наметна себеси.

Но пред да станеме жртви на државен терор, бевме соучесници. Пред да изразиме морална огорченост поради недискриминаторското одземање невини животи, ние го толериравме, а често и го славевме, истото гестаповско тактизирање, сè додека беше насочено кон оние што живееја во земјите што ги окупиравме или кон сиромашните и обоените луѓе. Го посеавме ветрот, сега ќе ја жнееме бурата. Машинеријата на теророт, усовршена врз оние што ги напуштивме и предадовме, вклучително и Палестинците во Газа, е подготвена за нас.

Крис Хеџис,countercurrents.org, 25.01.26.

Милошоски вели: „Нема да се градат бегалски кампови во Македонија."

Бидејќи е предвидено одбиените азиланти тука да работат во градежништвото, јасно е дека нема да се градат оградени кампови, туку ќе се градат станови, а азилантите ќе можат насекаде слободно да се движат како слободни и рамноправни граѓани. Неколку илјади одвишни луѓе, човечки талог кој претставува товар дури и за многу поголемата Велика Британија, ќе се пресели тука, евентуално за да ни ја простат гаранционата премија од околу 339 милиони евра за кредитот за брзата пруга (17.86% од 1,9 милијарди евра).

Ниту ни треба брзата пруга, што ќе ни донесе загуба од најмалку 3,3 милијарди евра, ниту ни требаат тие проблематични луѓе.

Ако веќе ги примаме, тогаш подобро нека ни исплатат по 110 илјади британски фунти по бегалец, колку што било договорено со Руанда, пред да им пропадне зделката. Со тие пари барем ќе градиме станови, ќе отвориме работни места и ќе го поткренеме нашиот БДП.

Вака становите би ги граделе со наши пари, а 339 милиони евра нема да добиеме, бидејќи повторно ќе завршат во Велика Британија, за гаранцијата од UKEF. Башка што ќе направиме загуби со пругата и ќе ја упропастиме Вардарска Долина за навек.

Дејан Трајковски, Фејсбук, 07.12.25.