Боли глава

Абе духовњаци, ќе има ли граница на вашата алчност и неморал?

Абе духовњаци, ќе има ли граница на вашата алчност и неморал, до кога ќе седите заробени во таа двојна игра и хипокризија, да се лажете себеси, ретките чесни, бројните наивни, да ве занима само имот, пари и политика.
Требаше да бидете некаков заштитник на македонската посебност, историја, традиција, а вие каде духовно хендикепирани, учествувате и во урбанистичкото и природно уништување на Македонија. Да не збориме дека ја крадете државата и народот, и не плаќате данок.

Веќе е досадно да се коментира оваа општа човечка бедотија која е просто насекаде во земјава. Не камилата низ иглени, вие сте општествен мастодонт, палеонтолошки остаток, атавизам, гигантско разочарување на кое само ќе му остане материјалното и бесчестието.

Ивор Мицковски, Окно, 23.12.20.

нема
23.12 22:36
Можеа да ни станат најголеми пријатели

Ме чуди само како Бугарите успеаја да ја продадат како европски консенуз фразата за „погрешно толкување на историјата“. Опседнати се. Веројатно затоа што најчесто биле на погрешната страна во историјата. И сѐ други им се виновни за тоа.

Сега имаа шанса да бидат на вистинската страна. Можеа да ни станат најголеми пријатели. А ни станаа најголеми непријатели.

Горан Михајловски, СДК, 18.12.20.

нема
20.12 22:49
Тито и Хитлер

Кон мене (во Скопје) беа прилично брутални кога се осмелив да го искажам своето неразбирање затоа што ја славеа четириесет годишнината од смртта на еден од најмрачните диктатори, Тито. За помалку од десет години тој убил речиси 1,7 милиони луѓе во поранешна Југославија. А тие таму го слават него. Градоначалникот на Скопје е партиски другар на Заев. Потоа веќе таму не бев толку популарна. Ама тоа е исто како градоначалникот на Берлин да дојде на идеја да го слави денот на смртта на Хитлер.

Екатарина Захариева, бугарска министерка за надворешни работи; за германски Велт; пренесено во Дојче Веле

нема
15.12 16:18
Партизанската приказна конечно нè обединува

Не е ли ова вистинскиот момент, шанса, конечно да се обединиме околу таа наша заедничка приказна после триесет години кавги околу нашето комунистичко минато? Токму сега, кога на двете скарани партии во Македонија, конечно, и под надворешна закана, како да им стана јасно дека без делото на партизаните, без АВНОЈ и АСНОМ, немоќно тонеме длабоко во историјата и ја губиме сегашноста.

Денко Малески, Плус инфо, 07.12.20.

нема
11.12 18:50
За водачот на ВМРО ДПМНЕ

Да се најдете, со име и презиме, во официјален документ на Европскиот парламент за „Мапирање на лажните вести и дезинформациите на Западниот Балкан“ е лошо. Но, да ве сместат во иста реченица со една класична десничарска будалетинка (која, на пример, упорно тврди дека земјата е рамна) и со човекот кој е европски синоним за пребеган политичар-криминалец – би требало да е вистинска катастрофа за некој кој се амбицира да претставува, па дури и да биде политички и идеолошки лидер на значаен дел од македонското гласачко тело.

Тоа за нас не е ништо ново, а не верувам дека ниту во Стразбур или во Брисел некој е особено изненаден. Него, се разбира, мува не го лази.

Дури, ова неславно европско „признание“ веројатно гордо го има закачено на реверот како конечна „иницијација“, потврда за припадноста кон своите поддржувачи дека, сега веќе, без резерви треба да го прифатат како легитимен анти-западен борец за „вистината за Македонија!“… Оти, и тие не се сигурни дали и нив не ги лаже повремено или постојано.

Сашо Орданоски, Цивил Медиа, 07.12.20.

нема
07.12 18:08
Треба да ги замрзнеме односите со Бугарија

Треба да ги замрзнеме односите со Бугарија додека тие не:

-расчистат со своето комунистичко минато;

-расчистат со своето фашистичко минато;

-расчистат со Санстефанските аспирации;

-престанат да употребуваат говор на омраза;

-почнат да ги почитуваат меѓународните конвенции кои ги ратификувале.

Мирјана Најчевска, Фејсбук, 04.12.20.

нема
04.12 22:44
Каде е проблемот на Бугарија

Мислам дека еден од основните извори на проблемот е во пренагласеното чувство на истоветност, коешто во Бугарија акутно се негува во однос на Македонија. Значи, сè што е сврзано со Македонија од историски, културен и јазичен аспект мора да биде квалификувано исклучиво со придавката „бугарско“. Следствено, во таква една атмосфера станува немисливо дека во Македонија може во официјално својство да се употребува јазик што не е означен како „бугарски“, туку како „македонски“.

Општествената свест во Бугарија, можам да речам дека во тоа е и доста искрена, на психолошко рамниште на Македонија и на сè македонско гледа безмалку како на ампутиран дел од сопственото тело. Многу тешко е да се прифати дека Македонија сега опстојува веќе како посебна нација, точно, многу блиска, но со свои атрибути, вклучително и јазикот. Токму ова доведува до трагичен заплет во приказната. Имено, на моменти се добива впечаток дека Бугарија тежнее такаречи да нè задуши во „прегратка“, да нè „влее“ во себеси, но со таа постапка го постигнува токму спротивниот ефект, па колку што таа повеќе стега, толку оној што е „прегрнуван“ пожестоко се оттргнува, дејство што „прегрнувачот“ го смета за изневерување, за кое сака да се одмазди.

Игор Радев, МКД, 03.12.20.

нема
03.12 22:44
Ветото на Бугарија или „да му цркне козата на комшијата“

1. Ветото на Бугарија не е пријателски гест.
2. Ветото на Бугарија нема никаква врска ниту со европските интереси, ниту пак со цивилизациските вредности.
3. Ветото на Бугарија прави трајна штета врз македонско-бугарските односи.
4. Зад ветото на Бугарија не стои никаков „бугарски патриотизам“, затоа што тоа вето не им служи на интересите на Бугарија, туку на некои други сили.
5. Ветото на Бугарија нема никаква врска со историјата како наука.
6. Ветото на Бугарија и прави голема штета на Македонија и никогаш нема да биде заборавено.
7. Ветото на Бугарија не е никаков изговор за говор на омраза и нетолеранција кон Бугарите, затоа што имаме голем број на бугарски и европски пријатели кои се спротиставуваат на неевропските политики на Бугарија.
8. Ветото на Бугарија не треба да не поколеба во стремежот да градиме пријателски односи со сите соседни земји и да ги подобруваме патните и други врски со Бугарија.
9. Ветото на Бугарија не може да се оправда со фактот што во Бугарија е почната предизборна кампања со елементи на говор на омраза кон Македонија, и што некои политичари печалат рејтинг за сметка на влошување на македонско-бугарските односи.
10. Ветото на Бугарија не може да се оправда со ништо друго освен со поговорката „да му цркне козата на комшијата“.

Жарко Трајаноски, Фејсбук, 30.11.20.

02.12 20:33
„Балканска муќкалица“

Денес ФБ-маркетот го отворивме во 6 часот. Богата понуда, како и вчера. Имаме: „Свежа македонска интелектуална салата“ од празни зборови, „Полнети пиперки со бугарски национализам“, „Гранде телешка шницла а ла Каракачанов“,  „Татар бифтек“, „Балканска муќкалица“, „Растурена ВМРОвска сарма“ и „Пратеничко шкембе во амандмански сос“.

Кулинарски хит на денот: „Зае(в)к на ражен“ и „Македонски јазик на жар“.

Акција: „Национална историја по багателни цени!“ Повелете, читајте!

Бошко Нацевски, Фејсбук, 01.12.20.

нема
01.12 11:54
Смее ли некогаш да се искритикува Заев, а да не те обвинат?

Ама, смее ли некогаш да се искритикува Заев, а да не те обвинат дека си вмровец? Или бранковист? Или антиевропеец? Зошто кон сите кои сме се нашле повредени од неговите ставови во врска со Бугарија и тоа јавно го кажуваме, веднаш се почнува со дискредитации, со хејтање по социјални мрежи, со банерчиња од типот „сети се снао“, со пораки: „Не му заборавајте на Заев што сѐ направил“. Многу направил и многу издржал. Супер. Ама, белким и ние сме направиле нешто. И нашите претци направиле и издржувале. Еве, тетка ми Маре издржала три години во бугарски затвор во Битола. И по ослободувањето, цел живот издржала да не ни ја пренесе омразата кон Бугарите оти никогаш не раскажа што ѝ правеле во затворот.

Паметењето што сѐ направил Заев не треба да нè натера да заборавиме што направиле нашите антифашистички предци. Држава ни направиле.

Горан Михајловски, СКД, 27.11.20.

нема
30.11 14:09
„Вие сте многу паметен човек. Како тоа да не сте богат?“

Една од омилените анегдоти ми е онаа со американскиот филозоф Жак Фриско. Некој милионер го прашал: „Господине Фриско, Вие сте многу паметен човек. Како тоа да не сте богат?“, а овој му одговори: „Господине Милионер, Вие сте многу богат човек. Како тоа да не сте паметен?“

На некои луѓе џабе им се сите милиони што ги имаат. Знам дека обичниот човек мисли оти кога би го добил она што го нема, ќе му се исполнат сите соништа и ќе биде најсреќен на светот. Најчесто тоа се парите, бидејќи со нив може да се купат многу нешта. Но, искуствата и од кај нас, и од светот, покажуваат дека не е баш така. Парите се важни како средство за сигурност, но тие не можат да ти купат памет, стил, свест за вистинските вредности, ниту за уживањата во животот.

Во тој тон, би рекол и дека политичар не може да биде успешен во политиката доколку не е светски човек. Тоа не значи само прошетан низ разни градови, туку да го гледа и да го впива значајното во тие градови, и да знае како би го пренел кај себе. Ние немаме таков во овие 30 години (па, и малку подолго), иако сме имале милионери на власт, и такви кои го стекнале богатството ислучиво преку политиката, а и неколку кои дошле веќе збогатени. На сите духот им е сиромашен, што ни едни пари не можат да го сокријат.

Миодраг Мишолиќ, Фејсбук, 26.11.20.

нема
26.11 10:37
Како Орбан го ограби унгарскиот народ

Дозволете ми да дадам неколку примери за тоа како Орбан го ограби унгарскиот народ. Префрли огромни суми јавни пари на голем број приватни фондации, кои индиректно ги контролира. Со вешт уставен трик Орбан сега трајно ги отстранува овие средства од јавниот домен; би требало двотретинско мнозинство од парламентот за да ги врати на унгарскиот народ. Се работи за речиси 2,8 милијарди долари.

Во серија измамнички трансакции, пак, компании блиски до Орбан купија над 16.000 респиратори за Унгарија за речиси милијарда долари, што е број далеку поголем од бројот на кревети за интензивна нега и медицински персонал што може да ги опслужува. Анализата на податоците за меѓународната трговија покажува дека Унгарија платила најмногу во ЕУ за респиратори од Кина, во еден момент уплатувајќи над 50 пати повеќе од Германија. Една од овие компании обезбеди и нарачка од Словенија, чиј премиер, Јанез Јанша, е близок политички сојузник на Орбан.

Џорџ Сорос, Проект Синдикат, 21.11.20.

нема
23.11 14:56
Сите да добиеме по едно екстра лето откако ќе заврши ова сето

Сакам да знаете дека се откажав од поезија и сега се залагам да не ни се рачунаат годините од пандемијата во животниот стаж.

Исто така мислам дека е фер

сите да добиеме по едно екстра лето

откако ќе заврши ова сето.

Освен бугарските политичари -

за нив екстра вето.

Тања Аждаја, Фејсбук, 18.11.20.

нема
20.11 11:33
Ситноколонијалниот Бугарин

Кој е ситноколонијален? Ситноколонијален човек е, на пример, Бугаринот, чија најфлагрантна, иако не и единствена можност да опстојува денес како колонијален субјект и покорувач, е државата Северна Македонија. Според него, „добрососедските односи“ се базираат на појдовното понижување што тој воопшто треба да признава нешто, кое според сите правила и убедувања си е „негово“. Бидејќи во меѓувреме тоа нешто го изгубил, ретката можност денес да триумфира како колонијален субјект за него значи да го предефинира „добрососедството“ во дипломатскo изнудување на едно асиметрично „пријателство“, раководејќи се од опортунизмот на ситуацијата. Се разбира, бугарскиот македонист е ситноумен во својот инает да испроси уважување како „авторитет“ и како одамна прогонетиот „голем брат“, мешајќи ги инаетот и желбата. Неговата ситноумост во колонијалните претензии всушност и доаѓа од желбата да биде признаен, но не и реализиран како колонизатор. За последново е премногу мрзелив: доволна утеха му е испросеното „добрососедство“ кое успеал да го дефинира според сегашните односи на моќ.

Станимир Панајотов, Окно, 04.07.20.

нема
18.11 14:12

Препорачуваме

Братство и единство

Парадоксално, овој „регион“ и оваа Југославија за мене повеќе постои сега, отколку во минатото.

Среќен 29 ноември, денот на македонската државност!

Од списокот на државните празници ние го избришавме најзначајниот датум за постоењето на македонската држава.

Само младоста во мене е совршена

Неа ја нема во огледалото. Скриена е во мене, како заглавен тромб.

Недостапноста на одржливо домување е резултат на капиталистичките контрадикции

Ако не можеме да ги реализираме основните општествени потреби заради контрадикциите на капитализмот, тогаш проблемот е во капитализмот, а не во нешто друго.

ОкоБоли главаВицФото