Боли глава

Не мора да се сложуваме со тоа што го правеле претходниците, во историска смисла на зборот, кога раководеле со претходниците, па и денеска со современото ВМРО-ДПМНЕ. Ќе поминат децении од денеска, па можеби некој и од нас ќе се оградува. Не значи дека ние се сложуваме со тие (на Ванчо Михајлов) политики. Но, тоа е еден континуитет којшто ВМРО-ДПМНЕ го има преземено и тој континуитет треба да се почитува.

Христијан Мицкоски одговара на новинарското прашање зошто се залага за затворање на клубот „Цар Борис“, а не го прави истото за клубот „Ванчо Михајлов“; Канал 5, 10.11.22.

Мојата вчерашна ФБ објава со информацијата дека Македонија е 36-та најбезбедна држава во светот ја (пре)објавиле 14 медиуми. Барем толку јас најдов. И сите ја објавиле точно онака како што ја имав напишано (copy-paste). Освен што го исфрлиле првиот параграф, од разбирливи причини.

Ми падна во очи дека единствено Frontline напишале дека текстот е мој. И, освен Frontline, уште само CivilMedia и Нова ТВ побараа дозвола од мене пред да го објават текстот. Ниту еден друг медиум.

Не патам од суети и лично немам проблем да се споделуваат мои ФБ објави, твитови и ставови, но сепак ме изненадува ако е ова редовна пракса и вообичаен начин на објавување вести во медиумите во Македонија!

Ацо Лукарски, Фејсбук, 07.11.22.

Кога ќе видам кого сѐ канат по медиуми, од сегашноста, а богами и од минатото, кој сѐ се дрзнува да анализира и кажува како било, како е и - пострашно - како треба, чија активност по социјални мрежи и секој можен статус од дијаспора ревносно се следи, кого сѐ амнестирала оваа пуста држава што апла, што на подзамижано, да ви кажам, ич не ме чуди кај сме.

Кога оние кои во една демократија и во една макар пристојна правна држава припаѓаат на маргините вие ги топорите на врвот на општеството - што ви останува тогаш и од врвот и од општеството?

Катарина Синадоновска, Фејсбук, 04.11.22.

Претседателката на Антикорупциска комисија, Билјана Ивановска, вели дека Владата воопшто не доставува
информации за избрани и именувани лица за да може да се полни Регистарот преку кој ДКСК треба да ги следи имотните состојби на функционерите:

„Владата воопшто не доставува. Зошто? Не знам, можеби има свои причини. Не знам. Неколку пати е покренато прашањето пред сите генерални секретари што сме ги затекнале, пред вицепремиерката сега што е, пред премиерот поранешен и сегашен...", вели Ивановска.

И самата не знам какви можат да бидат „своите причини“ на Владата, ама ова „воопшто не доставува“ е таков крупен скандал што во нормална држава уште ноќва би летале оставки.

Катарина Синадиновска, Фејсбук, 29.10.22.

Честитки за Данела Арсовска, најдобрата менаџерка на сите времиња и сите светови, што после само пет месеци успеа да спроведе јавна набавка за принтери и тонери во нејзината институција.

Честитки и за вработените во Град Скопје што за рекордно време им се овозможи да имаат основни канцелариски материјали и опрема. Ова е историски најкраткиот прекин во снабдувањето со принтери во една јавна институција!

Честитки и за граѓаните, организациите и бизнисите во Скопје! Сега ќе можете да добивате документи со потпис, печат, со сите салтанати... како во старите добри времиња!

Никола Наумоски, Фејсбук, 19.10.22.

(...) Или, пак, поголема навреда е дволичноста на ЕУ со онаа расштимана политика на 27 страни, преточена на терен преку изјавите на некои службеници дека „сега само уште Уставот да го смените“ и после сѐ ќе зависи од вас. Како бре, сѐ зависи од нас, кога една земја-членка на ЕУ не нѐ признава ни дека постоиме како Македонци што зборуваат македонски јазик, а вие тоа им го прифативте со писмен документ заверен во Брисел? Промената на Уставот е услов само за да ги почнеме преговорите. Но, не дадовте никаква гаранција дека Бугарија нема да го закочи нашиот прием во ЕУ повикувајќи се баш на таа изјава дека не постои македонски јазик. Па и овие провокации ги прават баш за да се искомплицира нашето влегување во ЕУ, промената на Уставот да биде уште потешка за проголтување. Еве до кај нѐ доведе тоа европско толерирање на бугарското негирање на македонскиот јазик и народ – таа земја сега на терен изедначува фашизам со антифашизам, а останатите 26 земји-членки си ги мијат рацете – не знаеме ние таа работа, решете си го билатералниот спор сами.

Горан Михајловски, СДК, 07.10.22.