Боли глава

Центар на Скопје, студени станови, црни темници, смрдливи влезови и соблазни паркинзи, одвратни програми, вести, дебати, емисии и серии,.. бесрамни политичари, трговци - воени профитери, лаги и флоскули ни татнат и нѐ центрифугираат низ домовите дури и кога ќе ги исклучиме телевизорите и машините... Добредојде, иднино!

Оливера Ќорвезироска, Фејсбук, 03.10.22.

Ј.П. Градски паркинг Скопје, под чие управување е паркингот пред зграда, решава дека граѓаните кои имаат возила треба да си ги ажирурираат податоците. Прават ревизија на сите договори за паркинг услуги што значи дека се сомневаат во сопствената работа, односно дека претходно се издавале дозволи на луѓе кои не треба. Супер.

Претпријатието има 269 вработени, плус директор, надзорни, управни одбори....и сите тие имаат плата благодарејќи на скопјани кои го полнат градскиот буџет и на граѓаните кои ги плаќаат нивните паркинг услуги,
И во 21 век, опцијата која ти ја нудат е една- само лично, кај нив во канцеларија, до 16 часот, кога вообичаено луѓето се на работа да отидеш , да ги ажурираш податоците за ревизијата која ја почнале во мај.

Нема опција преку мејл, нема опција ниту да се симнеш во куќарката на паркингот, во која 24 часа има нивни вработен човек и него да му ги оставиш податоците. На шалтерче, кај службеник, да си излезеш од работа, да им ја најдеш канцеларијата и да си ги ажурираш сам податоците, а овие 269 вработени плус десетици во управни и надзорни одбори, еве уште не ми е јасно што прават.

Фросина Димеска, Фејсбук, 30.09.22.

Македонските граѓани се, всушност, посветени Европејци кои го разбираат моментот на војната и мирот, неправдата и страдањата, империјалната агресија и заграбувањето на туѓи територии. Заедно со податокот од едно друго прашање од истражувањето – „Според вас, која држава е најголем сојузник на Северна Македонија“ – оваа руска шашма се растура во парампарчиња.

Само 1,2 отсто од испитаниците одговориле дека најголем македонски сојузник е Русија. За САД се изјасниле 19,8, а за Србија 37,4 проценти.

А во прашањето за тоа кој е најголем непријател на Македонија, Русија е во самиот врв – прва е Бугарија со 44 отсто, па немаат одговор 29,3 отсто и трета на листата е Русија со 12,1 процент. Озлогласената Франција е на дното на листата – со само 0,9 проценти.

Љупчо Поповски, Дојче веле, 24.09.22.

Има ли некој во Македонија што ќе побара Бугарија да го смени Ангел Димитров од историската комисија во интерес на добрососедските односи?

Има ли некој што ќе ѝ предочи на бугарската страна дека тој систематски шири лаги и користи говор на омраза кон членовите на македонскиот дел од комисијата и кон Македонија и Македонците?

Има ли некој да им јави дека тој човек не заслужува елементарно почитување а не пак да се разговара со него за историски прашања?

Има ли медиуми што ќе престанат да ги објавуваат неговите навреди и обвинувања кон Македонија и кои ќе остават глупостите и омразата да си ги користи само за домашна употреба и за јавност која сака да биде отруена од неговиот говор на омраза и шовинизам?

Ако нема, тогаш не ни се пишува добро. Еднаш мора да им се каже вистината в лице, колку и таа да не им се допаѓа.
Со таков расипан преговарач нема никогаш да се постигне било каков договор.

А можеби и не сакаат. Ако не го сменат, тоа им е целта. И тоа треба да го знаеме.

Ѓорѓи Спасов, Фејсбук, 20.09.22.

Талентот не може да биде роден во среќа. Среќата си е доволна за себе, празна, полна со себе, еби ја. Луѓето мислат дека секоја морска школка содржи бисер. А знаеш ли во која школка се формира бисерот? Така ли е, дека не може да биде во секоја? Се формира во онаа школка која во раната фаза на својот развој доживеала механички удар. И тука останува рана. Школката таа рана ја санира така што лачи супстанца која, откако ќе ја санира раната, се стврднува и станува бисер. На тој начин јас ја сфатив својата даровитост - од рана роден бисер. Можеби комплетната светска книжевност произлегла од солзите на едно дете.

Абдулах Сидран, Недељник, 14.09.22.

За Илинден сите во Крушево, Христијан Мицкоски во Ташмаруништа. За 8 Септември сите во Скопје, тој избега во Смилево. Што ќе прави кога ќе стане премиер на држава во која стана нормално опозицијата да си прави посебни прослави за најголемите државни празници? Секој со својата банда на плоштадите во освоените општини. Две музики нека се свират. Две знамиња нека се вејат. Нека се мразат луѓето меѓусебно. Инсистирањето на продлабочување на поделбите нема никаква логика за некој што сака да стане премиер, освен ако Мицкоски не е убеден дека колку повеќе луѓето се мразат, толку повеќе него ќе го засакаат.

Така што, ако алтернативата за неспособноста на СДСМ и самоволието на ДУИ е ова ВМРО-ДПМНЕ засилено со Левица, тогаш црно ни се пишува. Спас од сите нив треба да се бара.

Горан Михајловски, СДК, 09.09.22.