Боли глава

(...) Втората работа е отсуството на сериозни граѓански напластувања и структурирања, како во социјалната, така и во вредносната стратификација. Тоа, се разбира, е поврзано со отсуството на историја. Тоа многу убаво се гледа на Малиот ринг: саде револвераши, терористи и авантуристи, ебиветри и шалабајзери, нема доктори и научници, уметници, поети и истражувачи, трговци, министри и професори, спортисти и новинари. Нема жени, нема ништо, само една надуена, патетична лага пред потемкиновите кулиси (херкуловски, односно чинечитански, според други) од левата страна на Вардар. Тој граѓански дефицит се покажа фатален кога антимакедонските лаборатории решија да ја ангажираат како материјална сила на контрареволуцијата сета наталожена и нескротлива примитивност.
Бранко Тричковски, „Глобус“, 11.06.13.

На Илија не му се допаѓале моите ставови:-) И ако еден ден истиот не е на власт како ќе се раководиме ние МПЦ, кој ќе нè координира?!:-)

Владиката Пимен, на Фејсбук; 11.06.13.

Само мрачните сили на деструкцијата се креваат против Бога, црквата и културата. Г-дине Жерновски, зарем денес и Вие треба да бидете олицетворение на тие мрачни и деструктивни сили? Дури ни Хитлер не се дрзна во екот на Втората светска војна да ги уништува духовните храмови на народите. Зарем Вие ќе се ставите над неговата улога?
Од соопштението на Комисијата за односи со верски заедници и религиозни групи; Либертас, 07.06.13.

Нашите домови и згради нè колнат, нè молат, нè преколнуваат, аман доста, аман до кога, ние сме ви куќи, згради, не ни требаат силиконски барокни гради, антички затегања на задникот, бродарски липосукции и мостови од ботокс. Ние сме вашите згради и домови, варосајте нè, исчистете нè, служиме 40 години, можеме најмалку уште толку, оставете нè да комуницираме меѓу нас, подземно, оставете ни ги дрвата и калдрмите да си шепотиме ноќе кришум, оставете ги костените и јаворите... оставете ја природата во градот. Ако толку сакате урбани силикони одете во силиконската долина, таму карши мајчина ви во сончев град, таму зад Водно правете силиконска долина на барокот, таму ѝ е местото, таму градете ги градовите од имагинацијата на хеленизмот.
Никола Писарев, Окно, 07.06.13.

Све живо се искурназило и отвара четири за све. А бе нит рибине под Камени не зинуат поише на изџвакано интегрално лепче од Жито Лукс, за дудинка ич муабет да не праиме, а ако им закачиш бел црв, си ибале мајката, братучед. Прво ги намирисуат ко џукели отворена паштета покрај дпмнеовски контејнер, за да проверат датум производње, да видат од што леш се изцрвиле црвиве, па тек ондак, врло евентуално да отворат уста и да залапаат мамац, иначе, ц’к. Рибарине, мислам на Скопскиве рибари, од давна ги фрлија трските. Мрежи друже мој, струкои и малку динамит собран од новогодошњи петарди, бум – трес, зашеметуеш осиромашено рибно богаство, и собираш мрежа. Види братучед, само у Скопјево добијаш генерален утисак дека и у држаава све ти е стаено у стање на тешка превара од една страна, па на опасно високо ниво на наивност од друга страна, и максимален левел на обазривост од треќа страна...
Боки Бургија, Плусинфо, 24.05.13.

Мерилин Монро заради кариерата како актерка не сакала да раѓа деца и дури побарала да и извршат кастрација, односно хируршки зафат за да не може да забремени. Но, отпосле, кога и се јавиле чувството и желбата за мајчинство, не можела да го направи тоа бидејќи грешката била сторена, па утеха не можела да најде во никој случај освен со одземање на животот, со самоубиство.
Владиката Петар, на прес конференција; „Дневник“, 31.05.13.