Боли глава

Туку малку ме зачуди нејзината изјава во стилот БЦ ме мрази а со тоа ја мрази или не ја сака па дури и дека без неа не и мисли добро и на државата. Малку ме уплаши – Гоци влегла во филм дека државата, тоа ти била она. А Грујо или оној вистинскиот бате Саше, кои се и што се во тој филм, ма мила министерке? Можеби ти е наредено да мислиш и да зборуваш така, ама јас одамна мислам дека ти си само кукла, од оние де, што се на конец, а него го мрда не твоето другарче севишниот Грујо ни Мартинчо, туку вистинскиот газда на државата, семоќниот Саше.
Ацо Кабранов, „Либертас“, 11.01.13.

Јас го сакам вашиот претседател Владимир Путин, а чувствата се взаемни. Русија е голема демократија, и тоа не е земја во која премиерот некој граѓанин ќе го нарече „патетичен“. Во олку голема земја човек никогаш не е осамен, бидејќи во секое дрво, во секој крајолик, лежи надежта. Во Русите нема пакост, не, само големи чувства.
Жерар Депардие, новопечениот граѓанин на Русија, француски актер, згаден поради данокот за богаташите во татковината, им напиша писмо на Русите; HollywoodReporter, 04.01.13.

Деновиве се изнаслушавме дека треба да сме се врателе во парламентот, само не кажуваат како, односно чекам да видам некој спот од Република или Контра банда (ако не е тоа исто) како тоа треба да изгледа. На пример, како би личела салата? До секој платеник од ДПМНЕ ќе има по 3 специјалци? До прегрнатиот дует Талат-Бонева 10? Околу Трајко борбени коли? На местата за опозицијата бодликава жица и минско поле? Спремни платеници од власта да онанираат на параполициски акции? Сам или во друштво Антонијо ги гледаш клиповите? Во становите во Брадовци со украдени пари што ги направи ги гледаш снимките? Влатко цврсто им ја стегна раката на тие што клоцаа твои колешки пратеници? Илија, пардон, во Велес познат како фута, зошто не спиеш веќе во станот во Скопје? Талат уште мислиш дека на нас од СДСМ ни треба спас? Мислите дека некој не оперирал во мозокот и ништо не се сеќаваме? Мислите дека сме Ви простиле?
Јани Макрадули, „Плусинфо“, 03.01.13.

Од вчера парламентот усвои закон, на предлог на владата, според кој оној ден кога ќе станете возрасни и ќе ви треба работа, државата обезбедува вработување со посебна постапка за сите вас. Тоа вчера го усвои парламентот.

Никола Груевски им држи говор на деца од три до пет години; „Телма“, 29.12.12.

Ве бендисува, а?
Никола Тодоров, министер за здравство, одговара на новинарско прашање, колку чини рекламата за плаќање по учинок; „Либертас“, 22.12.12.

Кој направи државен удар. Опозицијата или власта. Бранко Црвенковски или Никола Груевски. Како се вика човекот под чија контрола е Владата, парламентот, претседателот, гувернерот, судството, новинарството, Црквата, полицијата, Армијата... Кога со сите овие институции на државата раководи еден човек кој единствено го има и клучот од државната каса, тој се вика диктатор, а системот - диктатура.
Ерол Ризаов, „Утрински весник“, 26.12.12.