Боли глава

Приватен сопственик по службена должност

Сопственик на „СГС“ е директорот на УБК Сашо Мијалков, приватен сопственик на Република Македонија по службена должност...
Зоран Божиновски, „Буревесник“, 09.12.12.

10.12 2012

Ѓаволски добро

Членовите на комисијата можеби не се доволно познати на јавноста, но ѓаволски добро ја знаат работата на која се посветиле.
Љубинка Корабоска, претседателка на државната агенција за спречување корупција; „Утрински весник“, 07.12.12.

09.12 2012

Сељак на сељак

Колку и да се зарекував дека повеќе нема да го коментирам „умниот“ ни Ацо самонаречен Рембрант, повторно не издржав. Ама и тој се надмина себе си. Таква бљувотина, таков чемер сее овој полуписмен тип во неговите „колумни“ во Утрински весник, што просто човек се ежи од гадост. И повторно решил да пишува за Скопје (старо и ново) и пак да ни држи лекции. И вели дека овде, во ова Скопје, на времето се доселувале „…довчерашните селани, кои грабеа кон градот како биволи во трк, носејќи ги во своите мобилни амбари кокошките и по некоја овца или коза …“ И како тие пролетери, вели овој типичен лумпен-пролетер, го упропастиле градот, на балконите саделе бостан и пченка, па по нив дошол Кензо Танге … и се’ во тој стил. Гадост до гадост. Но ми текна малку да ѕирнам во биографијата на овој депресивен дијареичар, кога таму – роден во Кичево!!! И сега, Боже благи, асли сељак ги кара другите сељаци, мега загадувачот урла по кутрите пролетери, неговите прасиња и петлиња ги с’ска на туѓите овци и кози. Ало, шутрак, сељак на сељак ли му држи лекции?
Златко Теодосиевски, 01.12.2012, на блог

07.12 2012

Толку беше

Од 2008 г. до денес, од мигот на најголемата историска грешка на ВМРО-ДПМНЕ, кога направија коалиција со ДУИ (и тоа токму кога првпат самите имаа мнозинство во Собранието, односно добија апсолутен демократски легитимитет!) кога сите перспективи се практично затворени, се наоѓа проклетиот круг во кој се случува крајот на македонскиот колективен ум. Во оваа временска рамка од само четири години, се случи погромот на сите подзаскриени извори на колективна енергија лоцирани околу вербата во (митот) – ВМРО-ДПМНЕ. Реконструкцијата на т.н. објективни фактори за сите погрешни политики веќе нема валидност, нема да биде оправдување, не може да биде утеха – сонот е скршен, надежта практично веќе ја нема. Kога и современите персонални еманации на македонската суштина рефлектирана во светите букви ВМРО ги дозволија сите понижувачки случувања на кои Македонците беа подложени веќе предолги четири години, преостанува единствено болното сознание дека – толку беше!
Тони Науновски, „Дневник“, 04.12.12.

05.12 2012

Мендух забрануе, а Пеџа рецитира

Тачи, овој нашиов де, Мендух, веројатно исфрустриран дека ривалот Ахмети тотално го исфрли од играта за албанската кауза, скина уште една зелена во негов стил, се разбира. Обзнани дека во Чаир ќе се забрани пеењето на Македонско девојче китка шарена. Значи, Тачи ја знае ама повеќе нема да ја пее, лут е човекот, го немаше ни во „Борис Трајковски“ на „Албанското знаме“, едноставно пропадна во земја. И одеднаш оп, ничим изазван, за да се појави во јавност, ама не ми е јасно како ќе го спроведе тоа, нит е власт а мислам дека не е ни авторитет. Еве мој Пеџа (живее во Чаир) ми кажа дека денеска на студов додека чекал автобус си ја рецитирал во себе Македонско девојче. Значи, Тачи, идејава ти е глупа, знаеш, се’ што е забрането е послатко. Што ако и твоите фанови по дома почнаат да ја рецитираат како Пеџа. Заеби, ај да продолжиме да си ги пееме и Македонско девојче и Шоте мори Шоте, Шоте машала. Ти си барем боем ако ништо друго.
Ацо Кабранов, „Либертас“, 04.12.12.

04.12 2012

Гебелс вода да носи

Мирослав Грчев, оригинална изјава:
Само дилетант и будала може да зборува за македонска култура и македонска историја во предисториско време, во неолит или палеолит.

Мирослав Грчев, во рекламата на ВМРО-ДПМНЕ:
Само дилетант и будала може да зборува за македонска култура и македонска историја.

„Граѓански“, 01.12.12.

03.12 2012

Шеќер и вода за Коце

Еве еден најсвеж пример за ЕУ која само што не се распаднала како што милуваат да кажат некои наши патриоти: градоначалничката на Софија Јорданка Фандакова му кажа на својот скопски колега Коце Трајановски дека досега од ЕУ обезбедиле милијарда евра само за 70 инфраструктурни проекти во Софија. Велат, кога ова го чул наш Коце побарал шеќер и вода.
Ерол Ризаов, „Утрински весник“, 29.11.12.

01.12 2012

Restless

Сите нации го имаат ова, но македонската е епифеномен, показен пример за овој децентриран идентитет, овој пост-модерен идентитетски парадокс! Обидот на оние кои НЕ ЗНААТ да го дефинираат идентитетот на Македонците сам за себе и од себе – завршува во македонскиот несмирен (restless), растроен, самодеструктивен национализам! Национализам кој не може, како секој либерален национализам, да ја развие нацијата и да и го најде местото во светот на нациите, туку ја удира од секој ѕид на кој ќе наиде, од секој друг кој ни е собеседник – се’ додека не ја раздроби на ситни парчиња, се’ додека не ја парчоса!
Љубомир Данаилов Фрчкоски, „Либертас“, 28.11.12.

30.11 2012

Во Македонија има помалку овци а повеќе говеда

Бројот на овци во Македонија последните шест години е намален за 200 илјади, а бројот на говеда е зголемен за 20.000 објави „Вест“.
„Плусинфо“, 28.11.12.

29.11 2012

Ако треба и лично

Цел на секој граѓанин, и моја, е стапување во брак и создавање семејство. Тоа е максималното нешто кое некој може да го оствари во животот. Со личен пример ќе придонесам за зголемување на наталитетот.
Панче Кралев, министер за образование и наука; „Махим“, 25.11.12.

28.11 2012

Делфинот на Груевски

Најпогоден прв да биде изеден ми изгледа токму најголемиот и најважниот млад талент на Груевски и Мијалков, популарниот Нино Тодоров, наследникот, делфинот на Груевски.
Ивор Мицковски, „Плусинфо“, 27.11.12.

27.11 2012

Тоалетни шампиони

Газејќи по калта пред очи ми се појавува сликата од претставата наречена Седница на Влада. На седницата со 120 точки која почна со 45-минутно задоцнување немаше точки за вакви примери како во Ѓорче. Немаше дури ни наместени прашања за барем еден проблем во Македонија. А најчеста реченица што се повторуваше беше: „Дали некој бара збор?“ Не! Овој текст ја красеше секоја точка, замислете 120 точки и 20-тина министри немаат ниту еден коментар за ниту една точка за која не се известители, односно читачи на готовиот текст. Би сакал и да потенцирам дека малку се разочарав кога премиерот Груевски отсуствуваше 1 час, а јас мислев може да издржи 15 часа без да оди во тоалет, ништо од македонскиот Чак Норис.
Јани Макрадули, „Плусинфо“, 21.11.12.

26.11 2012

Погрешив, но не обвинувам никого

Една од најголемите грешки ми беше тоа што во 2004 се кандидирав за претседател. Тогаш проценив дека секогаш има крај на сè, па и на моето претседателствување со СДСМ и донесов одлука да се повлечам, сметајќи дека има екипа која може да ја води партијата. Бучковски беше меѓу тие луѓе. Погрешив, но не обвинувам никого.
Бранко Црвенковски; „Плусинфо“, 23.11.12.

24.11 2012

Организацијата и македонскиот дух

Мислата дека треба да се напише нешто за револуционерната организација ми го облива срцето со крв. Да се пишува за една организација, која за резултат го има упропастувањето на Македонија, макар тоа не е само организација, туку Софија, со својот цар, со своите министри и генерали со својата државна, а не националистичка политика, ја погреба Македонија и и' причини огромни жртви од луѓе и материјални блага. Јас, пак, се чувствувам како виновен за сите тие злосреќи дека јас и моите другари станавме причина за револуционизирањето и како последица на тоа - погубувањето на Македонија и на Македонците. И јас му се чудам на македонскиот дух, како тие луѓе не не' убија со камења откако го согледаа грозниот и жалниот излез на нашата револуционерна иницијатива. Цела Македонија, како еден човек, со трогнувачка еднодушност тргна зад нас, ни ја даде сета своја поддршка и своја морална доверба да го водиме кон ослободување, а излезе дека сме го воделе кон упропастување и кон ново, уште потешко ропство и при такви дијаметрално противположни резултати пак да не не' обвинува, да не не' навредува, да не мрмори против нас - создавачите на револуционерната организација и водачите, туку молчаливо и со полна покорност на својата судба да си го преземе тешкиот голготски крст - тоа предизвикува во мене адмирација и велам: Македонци, вие не сте само херои, туку светци. За вас сите жртви се заслужни.
Иван Хаџи Николов, еден од основачите на ВМРО 1893; Ерол Ризаов цитира фрагмент од неговите Спомени; „Утрински весник“, 22.11.12.

23.11 2012