Боли глава

Системот е следен
или системот нè следи?

Ѓоко Здравески, Фејсбук, 10.12.25.

Пред некое време наголемо ни беше ветувано дека Скопје ќе биде исчистено за 72 часа. Меѓутоа, ние згрешивме што не побаравме појаснување на еден многу важен поим: исчистено. Сигурен сум дека се работи за различно поимање на овој збор зашто Скопје и по 720 часа воопшто не е исчистено по никаков стандард, тоа е истиот валкан град. Контејнерите се секој ден преполни, (не сум фрлил ѓубре со денови во нормално испразнет контејнер), тротоарите се полни со скапани лисја, има ѓубре по тревниците, чопори кучиња се шетаат низ град. И тоа не е само на ниво на град, тоа се гледа и во општините. Пред изборите, во сите општини се водеше агресивна кампања, па луѓе од народот, па едни од нас, па се снимаа со селфи камери низ маало, па по цркви свеќи палеа, демек сите религиозни и семејни луѓе, ни се качија на глава, а кога победија, толку. Дали бевме излажани уште еднаш? Секако. Сакам да кажам дека се лажам и дека еве од утре ќе се потрудат и работите ќе се сменат, ама искуството не ми дава, особено што тие што се на власт преку нивната кандитатка четири години систематски го упропастуваа Скопје. Скопје не го заслужува ова. Ние не го заслужуваме ова.

Александар Маџаровски, Фејсбук, 14.12.25.

Четвртина 21. век изминат. Луѓе зборуваат за вештачка интелигенција, за криптовалути, за скорешен лек за сите видови канцер.

Кај нас на локалните избори се смени една, седна друг, а Комунална хигиена пак не ни ги празни кантите за смет - си ги чуваме секојдневно претпорти, на и онака тесната улица, преполна со коли и канти. Веќе 11-ти ден не поминуваат, а поминаа вкупно трипати од дроновите и видеата на Орце. Веќе не се знае ни дали ќе биде четврток, понеделник или таму негде февруари-март.

Тукушто го наполнив багажникот со кеси со ѓубре, да го испразнам во некој од контејнерите кај комшиите од зградите. Декември, 2025. Немам што да додадам за оваа криза што ни се случува.

Всушност, сакав да додадам фотографија oд багажникот, но ми е срам од пријателите странци - вака, на македонски, барем нема да прочитаат.

Исто ко ни оние што ги плаќаме за да нѐ држат во оваа заложничка криза.

Татјана Б. Ефтимоска, 07.12.95.

Народот што аплаудира кога ќе слета авион, очекувано е да паѓа во транс кога локалната власт ќе ги испразни контејнерите. Не сме ниту најглупавиот, ниту најсиромашниот народ, ние сме само луѓе заробени во маѓепсаниот круг на разочарувања, кој нè држи укотвен во едно споделено чувство на она „ќути, може и полошо.“

Ирена Цветковиќ, Призма, 25.11.25.

Кога пола од населението ќе земе бугарски пасоши, а пола албански, каков пасош ќе земе жената чии марули на Водно годинава слабо родија.

Или ќе остане како апатрид во сопствената земја да ги проучува копенхашките критериуми, историјата на францускиот и на бугарскиот устав и критериумите на Венецијанската комисија, односно да не ги пушта Бугарите во уставот на државата што веќе ја нема.

Србија самата тврди дека без енергенти и со идиоти на чело на државата ќе колабира до крајот на годинава или еден месец подоцна, Ние, можеби, не сме така енергетски загрозени, но во идиотлукот ја делиме судбината на Србија, ако не ја и шиеме, па се поставува прашањето колку сме далеку од крајот.

Имаат ли надлежните органи елементарни проекции? Просто да знаеме уште колку живот ни останува. Година, две, три…И како да го поарчиме. На пијачка, секс или одмазди!

Бранко Тричковски, Фејсбук, 18.11.25.

Додека загадувањето го задушува народот, тие донесуваат закони со кои податоците за индустриските загадувачи ги прогласуваат за деловна и државна тајна. Наместо транспарентност и правда, добивме криење и лаги. Наместо да ни обезбедат здравје, ни обезбедија труење и смрт.

Оваа власт истренира 300 илјади луѓе да гласаат со исклучен разум, хранети со лажни ветувања и водени од лична корист, купена со наши пари. Сосема доволно за да им ја решат судбината на останатите 1,5 милиони луѓе, од кои половината решија да не гласаат на избори. Така опстанува овој штеточински режим, не со вистината, туку преку релативно мала група што верува во лагите што им се сервираат.

Со помош на платена пропаганда и послушни медиуми, државата ја претворија во споменик на лагата, а од вистината се плашат повеќе отколку од каква било катастрофа. Зашто само вистината не можат да ја купат.

Дејан Трајковски, Окно, 12.11.25.