Боли глава

Ми идеше да ги фрлам в контејнер и специјално купените чевли за одење на лустрација. Нормално, скромно, имав купено и неколку нови парталчиња, костуми не обожавам, зашто човек треба да се дотера за тој свечен чин. Носењето на изјавата, заверена со штембил од нотар, во надлежната канцеларија се случува еднаш во животот.

Но, расипувачот на забави и дијагностичар на дефектни закони, одлучи како во диспозитивот, и ми го скрати правото да им докажам дома дека не сум бил кодош.

Димитар Грумар; Дневник, 05.02.12.

Жал ми е што во манастирот Острог го крстив Чедомир Јовановиќ. Да знаев дека нема да го прими печатот божји не би го крстил во времето коа со свирчиња се боревме против покојниот Слободан Милошевиќ. Тогаш реков дека го крстиме човекот, а не обетката која Јовановиќ не сакаше да ја тргне ни за време на церемонијата на крштевањето. Денес сфаќам дека сепак сме ја крстиле обетката, а не човекот. Кога отец Јоил ми рече: „Што ќе правиме со момчево, како да го крстиме кога не сака да ја симне обетката“, му реков дека не ја крсти обетката туку човекот кој, кога ќе биде крстен, и самиот ќе сфати дека не му е потребна обетката. Сега на отец Јоил му велам: „Изгледа дека ја крстивме обетката“.

Епископот бачки Иринеј реагира на изјавата на лидерот на српската партија ЛДП Чедомир Јовановиќ во врска со одбележувањето на Новосадската рација; e-novine, 07.02.12.

Колкава ли е силата на ВМРО - ДПМНЕ кога се зајакнува со една морална дијабола каков што е Марјан Додовски? Или, пак, со Борис Стојменов, еден од ретките политичари кој влегува низ врата, а излегува низ прозорец.

Ивор Мицковски; „Утрински весник“, 06.02.12.

Груевски сака, злоупотребувајќи го докрај своето мнозинство, да му го покаже местото на албанскиот политички субјект, а тоа место е на опашката од неговата влада. Како и секогаш, греши во овие процени, оти се води од малициозност, а не од политичка и државничка прагма. Тој ја потроши ДПА до крајност при своето владеење. Тој може да го потроши и ДУИ во овие констелации, во кои се однесува крајно неодговорно кон демократските вредности и етничката стабилност. Но, колку и да се обидува, ниту тој, ниту кој било друг не може да ги потроши Албанците како значаен политички фактор во земјата. Како што тргнал победникот, Груевски може да ја потроши и Македонија, ама Албанците ќе останат тука со своите евро-атлантски идеали.

Теута Арифи во колумната „Демократура“; „Дневник“, 20.07.08.

Меѓутоа, она што мене ме загрижува во последниот извештај на Кризната група е нивното предвидување дека државата може да се распадне до 2014 ако Владата не ги промени магистралните политики кои ги спроведува без остаток. Ваква застрашувачка проценка Македонија нема добиено во нивните извештаи од 2001 наваму. Јас лично мислам дека тоа предвидување е претерано, но, ако веруваме во сценаријата од почетоток на разговоров, можеби тие знаат нешто што ние не знаеме?

Стево Пендаровски, „Плусинфо“, 30.01.12.

Груевски се жали дека подолг период има сериозни проблеми со фасадата. Ние подолг период имаме проблеми со владата, но никој не нè прашува.

Бранко Героски, дневен „Фокус“, 27.01.12.