Боли глава

И добро е што сега смеат да нè сликаат само полициски фотографи, кои прават фотографии на кои личиме на тормозени луѓе што поминале низ психофизичка тортура. Тие слики за нас и за нашата реалност говорат многу повеќе отколку илјадниците страници на светскиот дневен печат.

Кирчо Арсовски, „Нова Македонија“, 22.11.11.

На последните избори, освен како што е тоа нормално со опозицијата, бевме под жесток удар и на досега незабележана медиумска хајка од една мафијашка структура која држејќи во заложништво група новинари, сакаше да ја скрши кичмата на Македонија.

Никола Груевски пред подмладокот на ВМРО ДПМНЕ; „Вечер“, 21.11.11.

Новите технологии на ВМРО-вците се незамисливи за СДСМ. Тие не можат да разберат како Ставревски пет години води финансии, а нема ниту еден издржан скандал. Како Гордана Јанкуловска успева, после пет години, да ја држи полицијата под контрола, да реши скоро 90 посто од сите битни криминали во државава, а патем да живее нормално како што живеела отсекогаш.
(...) Му се чудат на Сашо Мијалков кој табана низ Скопје, и ги пердаши лично сите вмровски функционери, за кои ќе чуе некаква афера, или муабет низ градот. (...) СДСМ немал никогаш министер со упорноста на Миле Јанакиевски, до црни ноќи, да седи на работа и лично, со секој шеф одделно, да ги прегледува списите и предметите, за да биде сигурен дека нема подметнувања, корупција или грешка од незнаење.

Драган Павловиќ - Латас, Вечер, 21.11.11.

Пред 2000 години Македонија беше на врвот на светот, сега тркалото се сврте, но ми се чини дека повторно одиме нагоре.

Рубенс Муратовски, актер, изјава по потпишувањето на „Манифестот на Македониумот“; Курир, 11.11.11.

Али вели дека Никола има силна политичка волја. И внимавајте, Ахмети нè убедува дека имале заеднички ставови со Груевски од интерес на државата! Аууу! Е ова е пресврт! Поза 69 или - јајце на око!
Не знам што да кажам. Немам зборови! Комплименти за Никола Груевски! Како ги вози Албанциве и странциве, како да полагал на 16 години! Ова ни во „школата на Велија“ не се учи. Ова, бре, или е некоја виша математика, што јас едноставно не ја разбирам, или, сепак, Латас е во право кога вели: „После Демаќи, Ругова и Арбен Џафери, Албанците во регионот немаат политичари. Бивши шверцери, тепачи, пукачи и избацивачи не се за политика“.

Бранко Героски, „Фокус“, 11.11.11.

Суштината е Србија да го задржи идентитетот на Косово и Метохија и да го добие она што и’ припаѓа како на држава, а тоа е правото на зачувување на сопствениот интегритет. Тоа не е можно во конфронтација со целиот свет.

Борис Тадиќ, претседател на Србија, e-Balkan.net, 06.11.11.