Боли глава

Ах, Ѓелиќ, Ѓелиќ, за сè е виновен тој Божидар Ѓелиќ, сегашен колега на Наумовски и бивш министер за финансии во српската влада. Да не попуштеше, своевремено, пред убедувањата на Љубчо Георгиевски, па Грујота да си го задржеше за свој советник, наместо овој сега трапаво да глуми лидер вмровски... Не гарантирам за повеќе, ама, во најмала рака, ќе имавме 100 отсто повеќе шанси за прв пат во историјата да бидеме пред Србија. Да, кој знае кај ќе и’ беше алот, ако и таа тргнеше по советите на нашиов „преродбеник“... Биваше ли, стопанката, на толку грчки сватови ем невести на ДУИ, како капак на сè, и српски советник баш сега да нè стрефи!?

Никола Младенов, „Фокус“, 18.12.09.

Затоа, овие ликови се обидуваат со бедна пропаганда да ја зајакнат масовната хипноза, психоентропија, невроза и комплекс. Тие не се заинтересирани за суштинска катарза на националниот идентитет на Македонците низ кој би излегле како нација суверена во самоспознанието и со државотворен капацитет. Напротив, тие би ја спречиле таквата еманципација и соочување по секоја цена, зашто од масовното несвесно ја црпат својата политичка енергија. Оттаму, за нив решение за името претставува пропаст. Откако проблемот ќе се реши и државата ќе се придвижи напред, сите ќе сфатиме дека нема потоп и масовната хипноза ќе исчезне.

Петар Арсовски, „Утрински весник“, 17.12.09.

Ова четиво, Апелот, е полно со себесожалување и проектирана омраза, која како гној цеди на сите страни и базди во истите правци. Тоа е роб на стариот злокобен македонски архетип, дека сите нè мразат и дека сме заобиколени со четири волка. Дека единствено во ропство, со песни и ора сме всушност слободни и непокорени - вистинските ние? Тоа е исто така текст кој покажува колку поробениот ум не може да ги разлачи рационално причините за нашиот - владин неуспех на патот кон НАТО и ЕУ. Не може погенерално да создаде приоритети на национални интереси и за нив да приспособи политика и дипломатија - за да ги оствари. Наместо тоа тој „гуслари“, пее песни тагувалки, плачипи....овски епови за проколнатите Македонци. Не бре, браќа и сестри демократи, вашата влада е неспособна да реши проблем, без при тоа да ги загрози националните интереси на Македонија. Нејзе и' се чини тоа невозможно во спорот со Грција. За неа и можно да е тоа невозможно бидејќи толку им сече. Но, не е невозможно, напротив, возможно е без загрозување на нашиот идентитет.

Љубомир Д. Фрчкоски, „Дневник“, 15.12.09

Во едно колонијално дуќанче во приземјето на една скопска станбена зграда, какви што има илјадници, една жена го моли гранапџијата да и' даде на рабуш половина леб и по сто грама сирење и салама за појадок на децата. Трговецот со многу внимателност ја потсетува дека тоа му го повторува секое утро, но и оти има неплатен долг веќе два месеца. По повторната молба на сосетката тој ја советува за помош да и' се обрати на својата партија, чиј активист била и која е на власт. Сосетката му одвраќа, „тоа тебе да не те интересира, а јас повторно ќе гласам за мојата партија“.

Манчо Митевски, „Утрински весник“, 14.12.09

Насловите осамнаа со восклици. Гратис бања за пензионерите од премиерот! Седумдневен аранжман во бања за над 10.000 пензионери! Бесплатна рехабилитација за луѓето од третото доба! Од колевка па до гроба, најлепше је треќе доба!
Ете, тоа е премиер со визија. Ем пензионерите задоволни, ем бањите преполни. И сето тоа за бедни 1,5 милион евра. Башка, пред избори.
Има само една незгодна асоцијација. Кај нас, кога некој некому му мисли лошо, се вели: „Фиљан чоек да те бања“. Се мисли, секако, на последното бањање, откако човек ќе замине од овој свет. Сакам да кажам, се плашам да не почне Миленко сите да не колне: „Грујо да те бања гратис!“

Бранко ГЕРОСКИ, „Време“, 01.12.09

Според календарот на Маите, во 2012 година е крајот на светот, така што ич не берете гајле, нема да има потреба повторно да се нервираме за нови документи - овие ни се доживотни.

Мирослава Симоновска, „Сега“, 10.12.09