Боли глава

Не е точно дека жената не може да прифати да биде со маж кој нема пари

Не е точно дека жената не може да прифати да биде со маж кој нема пари. Жената не може да прифати да биде со маж кој е мрзлив, немотивиран, без амбиции, цел и план во животот. Тоа не ја прави „спонзоруша“! Кога ја прашале познатата холивудска актерка Елизабет Тејлор зошто има само богати сопрузи таа одговара дека може да биде во брак само со вредни, интелигентни и амбициозни мажи, а таквиот маж не може да не направи пари. Пејачка Шер во 1996 на интервју ја кажува познатата реченица „Мамо јас сум богат маж“ откако мајка и ја замолила да најде богат маж со кого ќе се омажи и ќе формира семејство и со ова застанува зад борбата на угнетувањето на жената и учењето дека сами не сме способни да направиме пари, успех и напредок.

За крај за мажите кои тврдат дека сите жени се спонзоруши – во животот привлекувате жени кои сакаат да го имаат тоа што го нудите. Доколку имате да понудите само пари и ништо друго, не е ни чудо што привлекувате само такви жени.

Ивана Наскова, Трн.мк, 29.09.23.

02.10 15:25

Игор Пачемски Џонс

Веста дека Скопје е Европска престолнина на културата ја дочекав резигнирано

Веста дека Скопје е Европска престолнина на културата ја дочекав резигнирано, небаре над мене виси еден голем чудилник. Шиканирањето со Фејсбук статуси почна од личности кои своевремено објавија дека Скопје „си фати девојка“ во моментот кога оној „џинџер Мефистофел“ Данела стана „градска мајка“. Кога ѝ ги видов сотонските веѓи и брадичето кое се слева до вратот на бронтосаурус, додека се завива со знаме како Цеца на концерт во Арена Армеец, богами малку и ми се слоши.

Не дека не се случувало и едните и другите да позирааат пред туѓи проекти, ама ова беше како Капо од Треблинка да е знаменосец на манифестација за еврејски права.

Игор Пачемски Џонс, Сутерен, 26.09.23.

27.09 15:04

Јавни простори

Ерол Ризаов

Во Македонија не се градат споменици по регуларен пат

Една мала група луѓе формиравме невладина организација со единствена цел во Скопје да подигнеме споменик на Кемал Ататурк кого го врзуваат многу работи со Македонија. Тропавме залудно речиси две години од врата на врата, запазувајќи ги сите законски прописи и правила. Како донација добивме и споменик од Турција, транспортиран до Скопје. Но не се најде парче земја, неколку квадрати, да се постави споменикот, кој на крајот заврши во дворот на амбасадата на Република Турција.

Во Македонија не се градат споменици по регуларен законски пат, како и многу други зданија, туку на диво по демократски пат. Навечер почнува, наутро осамнува, па ако смееш, обиди се да го урнеш.

Ерол Ризаов, Слободен печат, 16.09.23.

21.09 09:43

Ерол Ризаов

Место Србин ставете Македонец и видете дали одговара

Повторно кисело се смеам на извонредната книга на големиот драматург Душан Ковачевиќ за „20 српски поделби“ (Срби против Србите). Кисело оти ние имаме четири пати повеќе македонски поделби. Еве неколку наслови на поглавјата каде што зборот српски може да се замени со македонски, па просудете сами: Небесни и овоземски Срби, Происточни и прозападни, Патриоти и предавници, Рационални и ирационални, Монархисти и републиканци, Четници и партизани, Ослободители и ослободени, Срби и Југословени, Богати и сиромашни, Газди и раја, Србин поделен на самиот себе и уште девет поделби. Место Србин ставете Македонец и видете дали одговара.

Ерол Ризаов, Слободен печат, 16.09.23.

18.09 10:08

Фатмир Битиќи

Храната е зголемена 11% во Европската Унија, овде е зголемена 46%

Отидов во Комисијата за заштита на конкурентност. Разговарав со нив за да поведат иницијативи во неколку сектори за да видат дали евентуално можеме да докажеме дека има договарање за она што се случува. Ќе ги видите набргу податоците што ќе ги изнесеме.

Ако го видите зголемувањето на цените поради инфлацијата на светските берзи, тие се една четвртина помали отколку што се во Македонија. Нешто се случува. Не може нашата земја да е уникатна, изолиран остров, кога е составен дел од цела Европа. Ако храната е зголемена 11% во Европската Унија во берзанските цени, овде е зголемена 46%. Извинете, ама тоа не е етички.

Фатмир Битиќи, Зелена берза, 15.09.23.

15.09 09:51

Никола Писарев

Во собрание трeба да се донесе закон: ако си член на партија, не можеш да идеш у затвор

Во собрание трeба да се донесе закон: ако си функционер, член на партија и слично - да не можеш да бидеш тужен, гонет или да идеш у затвор.

Ваков закон лесно ќе донесат не со двотретинско него со четиричетртвртинско мнозинство и акламација.

Нѐ има доволно што живееме надвор од партија за да одиме по судови и да плаќаме казни.

А да, и Мијалков вратил 244.000 (со букви двесте четириесет и четири илјади евра), а украде пола милијарда, ако не и више.

Тоа ќе му дојде ко сеа да ми го вратат ретровизорот од ладата што ја украдоа 2014.

Никола Писарев, Фејсбук, 07.09.23.

07.09 09:53

Катарина Синадиновска

Престанете со политичко назначување на директори!

Инаку, да ве просветлам - имате многу просто решение како да не се политизираат катастрофите во здравството и да не се користат од страна на политичкиот опонент - престанете со политичко назначување на директори!

Ете ви, со тоа барем една катастрофа веќе ќе биде решена.
Ама нееее, тоа не ви е во план.

Вие си имате консензус дека клиентелата не смее да трпи, сакате ем да ставате директори од вашите пусулчиња, ем истовремено мрчите и да нѐ замарате со плачки за политички напади.

И едните и другите и третите и сите.

Отворете фино-лепо конкурси, обезбедете чесен натпревар и саглам селекција, тргнете тоа партиските раце на страна и после молим лепо - ќе ги критикуваме само професионалните достигнувања на раководителите.

Вака - нема мерит во избор, ама да имало „мерит” во критика? Ма немој!

Катарина Синадиновска, Фејсбук, 05.09.23.

05.09 16:35

Влатко Ѓорчев

Од 2017 и Заев со неговиот ’Живот во Македонија’, сме изгубиле 200 паралелки

Во 2017, годината кога се раѓаат денешните првачиња, родени се 21 700 деца. Сега, според овие тенденции, според овие бројки коишто се комплетираат, бројот на првачиња ќе биде можеби нешто под 18 000 првачиња. Тоа значи дека само до нивната 6-та година, до наполнети 6 години, сме изгубиле 15-20% деца коишто се иселиле и си заминале од Македонија сосе своите родители. Тоа е пад од фрапантни 4 илјади деца од 0 до 6 години. Поделете го тоа на 20 деца по паралелка, значи дека само од 0 до 6 години од 2017 година и Зоран Заев со неговиот ’Живот во Македонија’, сме изгубиле 200 паралелки.

Влатко Ѓорчев, 360 степени, 02.09.23.

04.09 14:34

Катерина Колозова

Предлогот на Макрон не е „Европа во повеќе брзини”

Предлогот на Макрон не е „Европа во повеќе брзини” од ерата на Меркел. Станува збор за секторскиот приод и новата методологија: во еден сектор може да си потполно интегриран, во други делумно дур трае пристапувањето. Ова е основата на методологијата од 2020. Ништо ново.
Како подетално би се разработила, останува да се види, но не значи – „чекајте да се реформираме за да влезете“, како што се шири параноја овде. Напротив, и оние што допрва станаа кандидати, во некои сектори би влегле целосно, иако нема да бидат полноправни членки до 2030, како Украина, Молдавија или Босна.

Толку знаеме, другото е методологија што допрва треба да се разработи. Читајте на англиски, германски, француски – овде е мочуриште од дезинформации.

Катерина Колозова, Фејсбук, 29.08.23.

31.08 11:37

Горан Михајловски

Не станува збор за евроскептицизам

Не станува збор за евроскептицизам. Туку за недоверба во преговарачкиот капацитет на оваа власт која нè убедува дека еве, само уште Бугарите во Уставот, и нема да има други барања. И за недоверба кон опозицијата која не е искрена кога вели дека не прифаќа промена на Устав под бугарски диктат. Но, најмногу за чувството на измаменост од ЕУ. Која не може да осигура дека ќе нема ново бугарско вето што ќе ги понижи Македонците.

Горан Михајловски, СДК, 26.08.23.

29.08 22:20

Христијан Мицкоски

Европа, Светот прави стратегија како да го скрши ВМРО ДПМНЕ

Европа, Светот прави стратегија како да го скрши ВМРО ДПМНЕ и оние 44 пратеници да изгласаат предавнички уставни измени. Немојте да мислите дека Ковачевски, Ахмети или Османи се тие, и немојте да мислите дека е лесно. Не е лесно. Силна борба се води за да се одбрани честа на македонскиот народ, кои овие корумпирани, ситни владини функционерчиња го продадоа македонскиот народ. Ќе се бориме, не знам дали ќе успееме, можеби нас ќе нè нема, но ќе се бориме, и ќе издржиме и јас ветувам, уставни измени под бугарски диктат нема да има, тоа го имате од мене како ветување.

Христијан Мицкоски, претседателот на ВМРО-ДПМНЕ, пред партиското членство во Кичево, 22.08.23.

25.08 10:28

Жарко Трајаноски

Ќосето ликвидира „30–40 души ќумурџии, заедно со нивниот добиток“

Ѓорѓиев, пак, во својата книга укажува дека „…кога зборува за својата активност во Гевгелиско при настојувањето за заштита на прекумерната експлоатација на шумите од страна на поедини бегови, Ќосето вели дека со својата чета ликвидирал 30–40 души ќумурџии, заедно со нивниот добиток.“ Ѓорѓиев го пренесува во фуснота и следното раскажување од „Спомените“ на „Ќосето“: „Групата Цигани и Турци требаше да мине од тука за Кожуф планина, зашто друг пат немаше. Едно утро при изгревот на сонцето, ете групата се појави од далеку. Ги опколивме, ги фативме и им теглевме еден сатар. Беа околу 30–40 души. Коњи, кучиња, магариња, мулиња, сè мина под сатар. Ние бевме околу 10-12 души. Имаше и 2-3 кучиња и нив ги истепавме.“

Жарко Трајаноски, Окно, 22.08.23.

23.08 12:52

Емилија Целакоска

Дисперзираниот жолтоклунец Попов од ВМРО ДПМНЕ

Некој дисперзиран жолтоклунец Попов од ВМРО ДПМНЕ вели, недоволно се вложувало во образованието. Оти во вмровско груево си знаевме дека сѐ ни е доволно само да не се расипува уште.

Заборавивте дека ВМРО ДПМНЕ направи закон со дебилно екстерно за студенти со жигосување? Зошто ви излегоа сите студенти и ве паднаа?

Заборавивте дека имаше екстерно за основци на раскантани компјутери „за секое дете” со незаконски кец во свидетелство и казни за неподобни наставници по вмровски критериуми?

Та вмро нема комисија за образование, има компанијамесоборанија кружок за како ќе каже боксерот или билдерот.

Наместо да се скрие вмро под ќебе на тема образование (да не зборувал и за наука, дисперзираниов), тие се прават на тошо!?

Емилија Целакоска, Фејсбук, 18.08.23.

21.08 17:09

Катарина Синадиновска

Нашиот главен општествен договор е згазен

Кога ќе ви дојде општеството на дереџе да нема никаква верба дека правдата воопшто постои – тогаш веќе ништо не е важно. А, кога ништо не е важно – сѐ е можно.

Вклучително и свесното ризикување човечки животи, кои веќе не вредат пет пари.

Македонија во моментов е во ситуација кога нашиот главен општествен договор – да имаме држава – е згазен.

Владеењето на правото, општествениот ред, законите еднакви за сите и јавниот интерес како општествен императив се основни предуслови за збирот луѓе кои направиле заедница да може да се нарече Република.
Ние на тоа веќе не личиме.

Немаме веќе луксуз на поделби по ниедна друга основа освен по главната – сакаме ли да имаме држава?

И ние сме тие кои ќе мора искрено да одговориме на тоа прашање, со вкалкулиран ризик дека потврдниот искрен одговор веројатно ќе значи и удар по сопствената комоција.

Катарина Синадиновска, Солуција.мк, 16.08.23.

16.08 14:10