Боли глава

Неспособните се способни способните да ги направат неспособни.

Бројот Еден, од стрипот „Алан Форд“

Се разбира, самоодбрана не значи само напад врз терористите, туку и нивно уништување. Затоа кажав толку јасно: ако терористите на Хамас се кријат зад луѓето, зад училиштата, тогаш ние доаѓаме до многу тешка област. Но, ние не бегаме од тоа. Затоа јасно им предочив на Обединетите нации: цивилните места тогаш можат да го изгубат својот заштитен статус; оти терористите тоа го злоупотребуваат. Германија стои зад тоа; за нас тоа значи сигурност за Израел.

Аналена Бербок, „зелена“ министерка за надворешни работи на Германија; говор во германскиот Бундестаг, 10.10.24.

Моето објаснување има неспорно оптимистичка физика: доколку темната црнотија што Тричко ја опиша веќе се има случено, а ние и да не спознаеме дека сме го допреле најлошото, тоа значи дека уште погрозните нешта што ќе ни се случат под тотално безумното водство на вемерето, ќе го доживееме само како релативно полошо од претходното, а ќе го спознаеме со безбедно задоцнување како и досега. Од ова произлегува суштинскиот оптимизам на моево непоколебливо гледање само на светлата страна од животот: несопирливото пропаѓање под водство на вемерето ни гарантира дека секој миг од нашите животи ќе го доживуваме како најдобриот од сите што ќе му следат во иднина. Има ли пооптимистичка слика на иднината, од таа дека секој ден од животот ќе ви биде најдобриот од сите што му следат? Нема, се разбира.

Мирослав Грчев, Слободен печат, 04.10.24.

По разрешувањето излеговте со јавна реакција за пропагандата кон Комисијата и за непримерни изјави и напади од страна на Мицкоски и Муцунски. Не се плашите ли дека некои кругови тоа ќе го сфатат како заземање страна во политиката?

-Практично бевме приморани да излеземе со таква реакција бидејќи кога премиер ќе даде суд дека досегашните членови на Комисијата „не ги штителе интересите на македонскиот народ“, тоа има сериозна тежина. Тие обвинувања, се разбира, се неосновани, и затоа одговоривме со заедничко соопштение. Впрочем, како што детално одговорив претходно, тројца од седум новоназначени членови биле дел од досегашната Комисија. Дали тоа значи дека и тие не ги штителе интересите на македонскиот народ кога во одреден период биле дел од Комисијата? Двајца, пак, од нив, се согласиле за текстовите на препораките усвоени во 2019 година. Дали тоа значи дека тие тогаш исто така не ги штителе интересите на македонскиот народ, посебно што тие препораки наидоа на остри критики од луѓе блиски до новата власт? Се разбира, воопшто не мислам дека е така. А ако е така, тогаш новиот состав треба да се огради и да ги поништи тие препораки од 2019 година, кои биле одобрени и од сега новиот копретседател од македонска страна.

Огнен Вангелов; интервју за Respublica, 17.09.24.

Двајца разговараат во кафеана, каков е твојот впечаток за Олимпијадата, мој впечаток е дека треба да се национализираат сите обложувалници, по ред, обложувалниците и коцкарниците, но тоа не е можно, што не е можно, се разбира дека е можно, тоа би било можно веќе утре, добар ден, добар ден, сопственичкиот статус на вашата обложувалница штотуку се промени, нов закон е донесен, имотот оди во рацете на локалниот здравствен дом и на јавниот базен, заборавете на судски процес, верувајте ми, само верувајте ми, не, нема да го правите тоа, не, туку своето дете ќе го запишете на пливање, од денеска е бесплатно за сите и условите за тренирање се подобри од било кога, но тоа не е демократски, што не е демократски, а народната демократија, а економската демократија, но тоа не е вистинска либерална демократија, е во вистинската либерална демократија ќе поверувам тогаш кога ќе го видам британското кралско семејство на шалтерот на бирото за вработување.

Урош Крчадинац, Фејсбук, 26.08.24.

Стапката на непланирана бременост кај малолетните девојки во Македонија е една од највисоките во Европа и таа изнесува 11%.

Стапката на малолетнички породувања е 15,7 на 1.000, што е речиси трипати повеќе од просекот од 6 на 1.000 породувања за земјите од Европската Унија.

Весна Матевска (ХЕРА); Цивил Медиа, 02.09.24.