Микрографија

Илустрацијата на структурата и движењето на крилјата на сината мува (Calliphora vomitoria), е една од 38-те скици кои првпат биле објавени во Лондон уште во 1665 година, во делото наречено „Микрографија”, кое претставува една од најзначајните книги во историјата на науката. Позната како прв научен бестселер, книгата е дело на англискиот физичар, натуралист и архитект Роберт Хук (1635 – 1703).

Нарекуван англискиот Леонардо, како член на Кралското друштво, Хук истражувал различни природни појави и бил еден од првите научници кои ја користеле најнапредната технологија на епохата - микроскопот. Благодарение на умешноста на оптичарите од 17 век, инструментот кој користел лупа и го отворал погледот во светот на минијатурното, веќе бил во употреба низ цела Европа.

Сепак, Хук бил првиот истражувач кој го користел микроскопот на систематски начин и врз основа на неговите набљудувања, го објавил делото насловено „Микрографија: или Физиолошки описи на минутни тела направени со помош на лупа”. Со опсервации и истражувања”.

Заедно со резултатите од набљудувањата, Хук во книгата дал увид во различни дисциплини, како и свое објаснување за природата на светлината - за разлика од Њутн, кој се залагал за теоријата на честички на светлината - тој светлината ја сметал за бран. Напишана на англиски јазик, за разлика од повеќето научни трудови кои во тоа време биле објавувани на латински, „Микрографија” стекнала исклучителна популарност и многу добро се продавала.

„Крилјата на сите видови инсекти се, во најголема мера, многу убави објекти и не му даваат ништо помалку задоволство на умот да шпекулира, отколку на окото да набљудува”, пишува Хук во „Микрографија”, полна со слични увиди кои биле сосема неочекувани за човек од 17 век. Во оваа книга, за прв пат во историјата на науката, Хук го воведува терминот „клетка” како основна единица на структурата и функцијата на живите суштества.

Извор: https://naukakrozprice.rs