Алба за птици

Тука сме по милост на птиците,
кои ни ги отстапија своите гнезда,
уште топли од крилјата.

Затоа не се плашам да летам.

Се плашам само од историјата,
која ги бележи соборените авиони
попрецизно од птичјиот измет
и ги брише од помнење владетелките на светот.

Птиците, пред првиот лет, ги учат
своите деца да го кажат
зборот земја,
за да им го опишат небото.

При глеткa одгоре луѓето сме мали.
Од облаци градиме куќи за ранети птици
како домови за нашите изгубени сни,
нив ги преселуваме меѓу ѕвездите
како шатори на номадско племе
во пустината, украсена со привиденија
на крилести суштества од песок.
И во погледот од нивните очи
за душата бараме потпора во бунар
зашто водата одамна пресушила.

Една птичја солза
може засекогаш да оджедни човек.
Само мора да строши зрна на симсот од прозорецот
без да мисли дека за стореното ќе биде возвратено.

Одново се обидувам да ги хранам птиците,
орам по небото, сеjам во водата,
жнеам карпи, камења, песок,
кружам меѓу црцорот на птиците
и земам пуфкава смеа како награда
за трудот. Или како трошки надеж.

Оти животот е само доба за учење
како да се родиш во птичјо срце.

Превод: Весна Ацевска

Цветка Бевц (Словењ Градец, 1960) е истакната словенечка писателка, музичарка и сценаристка. Дипломирала на студиите по музикологија и компаративна книжевност на Филозофскиот факултет во Љубљана, а потоа специјализирала на Универзитетот во Корк.
Пишува проза, поезија, драмски текстови, филмски сценарија и музика. Нејзиниот опус вклучува над триесет објавени книги (пет стихозбирки, четири романи, четири збирки на раскази, шест романи за млади, тринаесет книги за деца), голем број радиодрами (соработка со радио Љубљана, Марибор, Загреб и Трст), како и сценарија за документарни и играно-документарни филмови.
Разни избори од нејзини песни и раскази се објавени на повеќе јазици (англиски, ирски, италијански, германски, хрватски, српски, македонски, руски, латвиски, белоруски, естонски, турски, бугарски, кинески и др.), а посебни книги има објавено на англиски, хрватски, италијански, германски и македонски јазик.