Инклузивна модна ревија во Скопје

Лица со попречености беа модели на писта во Музејот на современа уметност во Скопје, на 25 септември, на ZEN Инклузивно Soirée со првата модна ревија на адаптирана облека направена за и презентирана од лицата со попреченост.

На ревијата беа промовирани панталони, кошули, маици, фустани и јакни со модерни дезени и дизајни креирани да придонесат за поголема независност и поквалитетен живот за лицата со попреченост.

Функционалната облека ги подобрува квалитетот на животот, гордоста и самодовербата кај лицата со попреченост и има цел да го олесни нивното секојдневно функционирање, да создаде поголема независност и да им помогне на нивните семејства, асистенти или старатели.

Парчињата кои се шиени според потребите и по мерка на лицата со попреченост се креација на дизајнерките Ена Зафировска Трајкова и Сара Величковска. Иницијатор за создавање на македонски моден бренд за адаптирана облека е претседателот на здружението „Икуалити“, Гере Трипков.

Фото: Небојша Гелевски