Почна најголемата реставрација на Рембрантовата „Ноќна стража“

Во холандскиот Националeн музеј во Амстердам во тек е најголемата реставрација на ремек-делото на барокниот сликар Рембрант Харменсон ван Рајн – „Ноќна стража“. По пет години истражување, осум реставратори за обновувањето почнаа да користат техники како што се дигитална фотографија и вештачка интелигенција.

„Ноќна стража“ е реставрирана најмалку 25 пати, а овој нов проект за истражување и обновување е најобемниот досега. Генералниот директор на Музејот, Тако Дибитс истакнува дека јавноста сега ќе може да го следи самиот процес на реставрација, што, според него, ќе биде уникатно искуство.

Реставрацијата почнува со отстранување на лакот од сликата, со што ќе се открие богатата историја на уметничкото дело на легендарниот холандски сликар. Лакот нанесен при реставрацијата од 1975 до 1976 година ќе биде отстранет со микрофибер крпи и памук.

„Ноќната стража“ на Рембрант од 1642 година е слика изработена во маслена техника и претставува една од најраните слики што ја прикажува групата во акција. Тимот конзерватори од холандскиот музеј ќе работи во стаклена комора за да може процесот да биде видлив за јавноста.

Сликата првично е обложена со темен лак, а со годините, тука се наобрало прашина, така што остава впечаток дека прикажува ноќна случка, поради што во осумнаесеттиот век го добила името „Ноќна стража“. Изворниот наслов, според некои истражувачи, гласел: „Градските чувари на Вториот округ под команда на капетанот Франс Банинк Кок“. Називот „Ноќна стража“ првпат е употребен во запис од 1797 година.

Сликата била оштетена со нож двапати – во 1911 и во 1975 година, кога напаѓачот направил дванаесет резови на платното. Во 1990, друг напаѓач ја испрскал сликата со киселина, па благодарение на брзата интервенција на чуварот, само лакот бил оштетен.

Повеќе од два милиони посетители годишно доаѓаат да ја видат оваа слика во Националниот музеј.

Извор: https://www.bbc.com