Изложба на фотографии и промоција на книга - „Треперење“ на Боро Рудиќ

Изложбата „Треперење“ на фотографот Боро Рудиќ ќе биде отворена на 3 декември (вторник), со почеток во 19 часот во галеријата на Младинскиот културен центар во Скопје. На настанот ќе биде промовирана и неговата најнова фото книга „Треперење“.

Преку оваа изложба и фотомонографија, авторот истражува можност за редефинирање на перцепцијата на естетиката во однос на традиционалните норми. Природата е најчестиот мотив во фотографијата, често окована со одредени правила и табуа кои ја обликуваат нашата визуелна перцепција. Што се случува со нашата перцепција како набљудувачи (или фотографи) кога излегуваме надвор од зоната на удобност и ја гледаме природата на сосема поинаков начин? Оваа изложба има за цел да ги предизвика воспоставените визуелни концепти, поттикнувајќи ги гледачите да ја преиспитаат и да го реинтерпретираат она што го сметаат за естетско во природниот свет.

Изложбата тежи кон ослободување од стандардните канони на убавина, овозможувајќи нов поглед на природата преку иновативни и неконвенционални техники на фотографирање. Преку овој проект, авторот се надева дека ќе се отвори дијалог за флексибилноста на естетските норми и ќе се поттикне креативно размислување надвор од традиционалните рамки.

Боро Рудиќ е македонски фотограф кој работи и живее во Скопје. Се школувал во Скопје, каде дипломирал на Електротехничкиот факултет. Во својата кариера Рудиќ работел на уметничка и пропагандна фотографија, а се занимавал и со фотодизајн. Притоа, тој соработувал со повеќе македонски рекламни агенции, неговите фотографии се застапени во повеќе книги и монографии, а бил директор на фотографијата во околу 30 рекламни и музички спотови. Рудиќ учествувал на повеќе од 15 самостојни изложби и на над 250 групни изложби на кои добил повеќе од 50 награди. Тој е носител на фотографското звање „Мајстор на фотографијата“ што го доделува Фото сојузот на Македонија.