„Имав сон...“

Автопортретите на Олга Стајнприс отворено го прикажуваат животот исполнет со притисокот да се биде „совршена“ мајка.

Композитните слики на фотографката создаваат надреални реалности во кои коегзистираат секојдневните барања на мајчинството и фантазиите за нејзиниот стар живот без деца.

Фотографијата отсекогаш претставувала важно хоби за Олга Стајнприс, но дури откако станала мајка, уметницата вистински се нурнала во сопствениот свет на создавање слики.

Започнувајќи со проучување на занаетот на интернет, со едноставна желба и надеж да направи неколку вешти семејни фотографии со своето првородено дете, Олга полека, низ годините, се префрлила на правење фотографии со поконцептуален пристап.

Во нејзината тековна серија насловена „Имав сон...“ самоуката фотографка прави низа од автопортрети и композитни слики од неа и нејзиното семејство кои имаат многу да кажат за мајчинството.

Без разлика дали е претставена со три раце или три глави, уметницата се прикажува себеси среде често неуправливите задачи на мајчинството во прилично надреални сцени.

„Серијата започна со неколку индивидуални дела кои првично ги создадов за да ги обработам моите чувства на обземеност од бескрајниот циклус на секојдневни задолженија и притисокот да бидам совршена мајка“, вели таа.

„Во текот на работата, сфатив дека сите овие слики се поврзани со една заедничка тема: борбата да се балансира личниот идентитет со бараните улоги на мајчинството“.

Извор: https://www.itsnicethat.com