Ќе направиш ли, од љубов, сѐ за мене?

Три песни: Крајчето од лебот, Бојкоти, Владата не ја донесе одлуката за ограничување на мажите.

Крајчето од лебот

Го јадеш ли крајчето од лебот?
Дали сѐ уште ти готви мајка ти?
Во кој маркет купуваш во недела?

Ти доаѓа ли да избегаш од земјава?
Дали секој ден се предомислуваш?
Тука ли ти се сите роднини, пријатели?

Дали на другите им го даваш поубавото?
Дали на другите им го даваш последното
парче пица, колаче со чоколадни парчиња?

Кај си тргнал? Кај се гледаш за пет години?
Дали како дете, на враќање од самопослуга,
и ти лебот го штрбнуваше од глад и нетрпение?

Што ќе направиш на крај?
Ќе направиш ли, од љубов, сѐ за мене?

Бојкоти

Ja bojkotiram slovenske mandarine. Jučer sam kupio 1kg
hrvatskih mandarina u Mercatoru i sve sam ih pojeo.
Odlićne su bile. Još ču jih kupovat. Znam kupit i paradajza. 
– grlomujagode, 26.11.2008, Forum.hr

Читам цените во Хрватска во февруари 2025
биле повисоки отколку во некои поразвиени

европски земји – па Хрватите повикуваат на
бојкоти. Се проширија и кај нас во Македонија.

Читам текст што вели бојкотите биле заразни.
Се бојкотирало и во Босна и Херцеговина,

во Србија и во Црна Гора; само во Словенија,
не. Изгледа оти им се повисоки платите

одошто нам и на Хрватите.
Читам и стари објави на форуми

што ме потсетуваат на татко ми.
Кога не читам истражувања за нови болести,

читам и совети за безнадежно вљубени.
Но имам надеж. Па читам и за бојкоти.

Владата не ја донесе одлуката
за ограничување на мажите

Почнав да не догледувам.
Ме збунуваат наслови и сега
морам да ги читам по двапати.

Исто, во последно време,
баш и не ми е гајле за мажите.
Особено не за ограничените.

Логично, наполнив 46 години
и сега носам очила за читање
со диоптер еден и пол, но и

нелогично засакав некого
што пораснал, исто како мене,
во СФРЈ, по којашто воопшто

не сум носталгична; освен кога
мислам на детството, татко ми
и мајка ми, а мајка му и татко му

сѐ уште се живи и тој не знае,
иако може да претпостави,
сѐ уште не знае како е, како е.

Слики: Adolf Born

Магдалена Хорват (Скопје, 1978) е авторка на книгите „Ова е таа, твојата“ (Македонска реч, 2006), „Синкаво и други песни“ (Македонска реч, 2010), „Осетлива на светлина: Избрани песни“ (Темплум, 2018) и „Најблиски“ (во изработка), во која се наоѓаат овие три песни. Други песни од најновата збирка што се објавени на Окно се: Тут фаранги, На мајка ми, Корнфлекс, Пневмонија, Терминал, Адв. Илија Марков или Марковски и Сакав