Капење

Ја фрлив облеката во воздухот буен
за да се искапам сосема гола во изворската вода;
ама тишината на ноќта ме заведе,
да ѝ ја раскажам мојата заумна приказна.
Студените бранови треперливо
одекнуваа, сладострасно ме опкружија
и со нежните кристални дланки
ме втурнаа длабоко во себе.
Одеднаш далечно ветре се приближи
и истури грст латици во мојата коса,
а во устата ми дувна здив на евроазиско нане
со остар мирис што се прилепува за срцето.
Тивко и предавајќи се ги затворив очите,
го притиснав телото врз меките млади трски
и како жена свиткана во прегратки на љубовник
му се предадов на течението.
Усните на водата, брзи, трескавично жедни,
плискаа бакнежи по моите бедра,
и одеднаш потонавме, опиени, задоволни,
ние грешниците, моето тело и душата на изворот.

Препев: Анета Попова