Токму така, или...

Токму така велат, настанал животот,
Токму така.
Немало ништо. Или имало хаос.
Збувнал сеопштиот котел
и од вриежот се излачиле
четирите основи:
оган, вода, земја, воздух.
Или претходел барутен раскин
на светлина од темнина,
на ред од неред.
Од нив настанал светот,
или од шест дребни тули
и од шест чудни плочки
помали од точка,
а од светот животот.
Или од дребно јајце.
Или од капка млеко.
Или го создал Бог.
Или движењето.
Или постара од сѐ е волјата,
хидра со безброј глави,
слепа и нема,
која раѓа без престан,
и без престан голта
од сѐ што се родило
или изродило.

Песно моја,
чија си ти,
од што си ти?