Светилиште

Божица на Месечината и на менструалната крв
дреме во шумата крај патот опкружена
со два лава (два пантера? два елена?)
има легло од мов и покривка од козина
венец од бршлен на главата и ѓердан од желади
Лицето ѝ е замачкано од пепел нокти од капини
седи на пирустија крај згаснато огниште
и зборува завиткано нејасно извртено
Кај неа доаѓаат бледи дактилографки
претепани келнерки продавачки на сладолед
измамени работнички од бензинските пумпи
ѝ носат на подарок најлон чорапи
чоколадни вафли шишенциња евтини мириси
потоа се враќаат кон своите љубовници
што нестрпливо трубат чекајќи на паркингот
Попат, брзајќи, сопнувајќи се од празни конзерви
кинејќи си ги чорапите (проклети капини!)
ги забораваат магичните формули кусите песнички
баењата советите и предупредувањата
И на прашање Каде толку се задржале
одговараат дека Мажите не мораат сѐ да знаат