Кирк беше урнек на новонастанатиот христијански фашизам

Атентатот врз Чарли Кирк најавува нова, смртоносна фаза во распаѓањето на разединетите и исклучително поларизирани Соединети држави. Додека отровната реторика и заканите се фрлаат преку културните поделби како рачни бомби, понекогаш прелевајќи се во вистинско насилство — вклучувајќи го убиството на почесната претседателка на Претставничкиот дом на Минесота, Мелиса Хортман и нејзиниот сопруг, и двата обиди за атентат врз Доналд Трамп — убиството на Кирк е предвесник на целосен општествен распад.

На движењето што го претставуваше — засновано врз христијански национализам — неговото убиство му даде маченик. Мачениците се пулсот на насилните движења. Секое двоумење пред употребата на насилство, секој разговор за сочувство или разбирање, секој обид за посредување или расправа е предавство на маченикот и на целта за која умрел бранејќи ја.

Мачениците го сакрализираат насилството. Се користат за извртување на моралниот поредок. Изопаченоста станува морал. Ѕверствата стануваат херојство. Кршењето на законот станува правда. Мразењето станува доблест. Алчноста и непотизмот стануваат граѓански доблести. Убиството станува добро. Војната е конечната естетика. Тоа е она што доаѓа.

Луѓе бегаат поради истреланите куршуми за време на појавувањето на Чарли Кирк на Универзитетот Utah Valley на 10 септември 2025 година во Орем, Јута.

„Мораме да имаме челична решителност“, рече конзервативниот политички стратег Стив Банон во своето шоу „War Room“, додавајќи: „Чарли Кирк е жртва на војната. Во оваа земја сме во војна. Да.“

„Ако не нѐ остават на мира, тогаш нашиот избор е да се бориме или да умреме“, напиша Елoн Маск на Икс.

„Целата радикална десница мора да се обедини. Доста е од оваа глупост со внатрешни борби. Се соочуваме со демонски сили од пеколните јами“, напиша коментаторот и автор Мет Волш на Икс. „Оставете ги личните расправии настрана. Сега не е време. Ова е егзистенцијално. Битка за сопствено постоење и за постоењето на нашата земја.“

Републиканскиот конгресмен Клеј Хигинс напиша дека ќе го искористи „конгресното овластување и секое влијание врз големите технолошки платформи за да наложи итна доживотна забрана на секоја објава или секој коментатор што го омаловажува атентатот врз Чарли Кирк...“ Подоцна додава: „Исто така ќе се погрижам за нивните деловни лиценци и дозволи, нивните компании ќе бидат агресивно ставени на црна листа, треба да бидат исфрлени од секое училиште, а возачките да им бидат одземени. Во основа ќе ги отпуштам овие зли, болни ‘животни’ што го слават атентатот врз Чарли Кирк со екстремна предрасуда.“

Коосновачот на Палантир, Џо Лонсдејл, ја искористи смртта на Кирк за да се заложи за отстранување на „црвено-зелениот сојуз“ — „комунисти и исламисти“ — за кои тврди дека се обединиле за да ја уништат западната цивилизација. Тој предлага апликација во која граѓаните можат да пренесуваат слики од криминал и бездомништво во замена за „поврат на данок на имотот“.

Радикално десничарскиот комичар Сем Хајд, кој има речиси половина милион следбеници на Икс, како одговор на објавата на Трамп за смртта на Кирк напиша: „Време е да ја завршиш својата проклета работа и да ја преземеш власта... ако сакаш да бидеш повеќе од фуснота во одделот ‘Американски колапс’ во идните историски книги, сега или никогаш.“ Во својот твит ги означува членовите на администрацијата и приватни воени изведувачи.

Конзервативниот глумец Џејмс Вудс предупреди: „Драги левичари: можеме да имаме разговор или граѓанска војна. Уште еден удар од ваша страна и повеќе нема да го имате тој избор.“ Неговиот твит повторно го објавија речиси 20.000 луѓе, доби 4,9 милиони прегледи и повеќе од 96.000 лајкови.

Ова е пример за мноштвото отровни чувства што ги споделуваат и поддржуваат десетици милиони Американци.

Одземањето на имотот на работничката класа, 30-те милиони што беа отпуштени поради деиндустријализацијата, предизвика гнев, очај, дислокација, отуѓување и поттикна магично размислување. Тоа ги хранеше теориите на заговор, жедта за одмазда и славењето на насилството како лаксатив за општественото и културното пропаѓање.

Христијанските фашисти — како Кирк и Трамп — лукаво го искористија овој очај. Го разгореа жарот. Убиството на Кирк ќе го запали.

Дисиденти, уметници, хомосексуалци, интелектуалци, сиромашни, ранливи, обоени луѓе, оние без документи или оние што не ја повторуваат безумно фразата на изопачениот христијански национализам, ќе бидат осудени како човечки загадувачи што ќе бидат отсечени од политичкото тело. Тие ќе станат, како и во сите болни општества, жртвени жртви во залуден обид за постигнување морална обнова и повторно стекнување на изгубената слава и просперитет.

Канибализацијата на општеството, залуден обид за повторно создавање митска Америка, ќе го забрза распадот. Опиеноста со насилство — многумина од оние што реагираа на убиството на Кирк дејствуваа возбудено поради надоаѓачкото крвопролевање — ќе се храни само од себе како огнена бура.

Маченикот е клучен за крстоносната војна, во овој случај за ослободување на Америка од оние што Трамп ги нарекува „радикална левица“.

Мачениците се обележуваат со церемонии и дела на сеќавање за да се потсетуваат следбениците на праведноста на целта и подмолноста на оние што се обвинети за маченичката смрт. Тоа е она што го направи Трамп кога на 10-ти септември во видео порака го нарече Кирк „маченик за вистината и слободата“, му го додели на Кирк Претседателскиот медал на слободата и нареди знамињата да се веат на половина копје до недела. Затоа ковчегот на Кирк ќе биде вратен во Феникс, Аризона, со авион на Air Force Two.

Кирк беше пример за нашиот новонастанат христијански фашизам. Ја промовираше Теоријата за голема замена, која тврди дека либералите или „глобалистите“ им дозволуваат на имигрантите со поинаква боја на кожа да влезат во земјата за да ги заменат белците, искривувајќи ги имиграциските трендови во заговор. Тој беше исламофоб, твитајќи „исламот е меч што го користи левицата за да ѝ го пресече гркланот на Америка“ и дека „не е компатибилен со западната цивилизација“.

Кога детската Јутјуберка, г-ѓа Рејчел, кажа „Исус вели да го сакаме Бог и да го сакаме ближниот свој како самиот себеси“, Кирк одговори дека „Сатаната цитирал многу стихови од Светото писмо“ и додаде: „Инаку, г-ѓо Рејчел, можеби би сакале да ја отворите вашата Библија — во помалку цитираниот дел од истиот дел од Светото писмо, во Левитскиот законик 18, пишува дека ако легнеш со друг маж, ќе бидеш каменуван до смрт.“

Тој бараше да го поништиме Законот за граѓански права од 1964-тата година и ги омаловажуваше лидерите за граѓански права како Мартин Лутер Кинг. Го понижуваше црното население: „Ако имам работа со некоја идиотска црнкиња во службата за корисници... дали таа е таму поради афирмативна дискриминација?“ Рече дека „црнците кои се криеја“ ги таргетираат белците „за забава“. Ги обвини Black Lives Matter за „разурнување на ткивото на нашето општество“.

Кирк инсистираше дека изборите во 2020-тата биле украдени од Трамп. Ги основаше Professor Watchlist и School Board Watchlist за да ги исчисти професорите и наставниците од она што тој го нарекуваше „радикално левичарска“ агенда. Се залагаше за телевизиски јавни егзекуции за кои инсистираше дека треба да бидат задолжителни за гледање за децата.

Идејата дека се залагаше за слобода на говорот и слобода е апсурдна. Тој им беше непријател на двете.

Кирк, кој беше обожавател на култот за Трамп, ја отелотворуваше хипермажественоста која е во срцето на фашистичките движења. Тоа можеби беше примарана привлечност за младите, особено за белите мажи. Тврдеше дека постои „војна против мажите“, го фетишизираше оружјето и им го продаваше Трамп на своите следбеници како вистински маж.

„Доналд Трамп можете да го нарекувате како сакате“, напиша тој. „Никој никогаш не го нарече женствен. Трамп е огромен среден прст за сите врескачи редари кои ги напаѓаа младите мажи само затоа што постојат. Тој е огромен предизвик за феминистичкиот естаблишмент што никогаш не бил предизвикан пред тој да слезе по златните подвижни скали. Повеќето медиуми тоа го пропуштија. Младите мажи не.“

Историјата покажа што следува. Нема да биде пријатно. Кирк, воздигнат како маченик, на оние што сакаат да ја уништат нашата демократија им дава дозвола да убиваат, онака како што беше убиен самиот тој. Тоа ги укинува малите ограничувања што сè уште постојат за да не заштитат од злоупотребите на државата и од насилството на осветниците. Името и ликот на Кирк ќе бидат искористени за забрзување на патот кон тиранијата, токму така како што тој би посакал.

Насловна слика: Mr. Fish