Доживелиците на македонските писатели од улицата „Данил Хармс“ (1)

Чашуле и Малески го плашат Митрев

Коле Чашуле еднаш решил да го исплаши Димитар Митрев и се сокрил под една клупа на булеварот ЈНА, каде што секој ден во исто време поминувал авторитетниот и немилосрден книжевен критичар и теоретичар.

Владо Малески, не знаејќи за намерата на колегата, исто така решил истиот ден да го исплаши Димитар Митрев; со помош на кожниот мантил се преоблекол во Коле Чашуле и се сокрил под друга клупа.

И кога изрипале двајцата…!

Бизарната сцена случајно, одејќи на работа, ја видел Лазо Колишевски, првиот човек на македонските комунисти, и веднаш решил несериозните другари соборци и писатели да ги прати во дипломатија.

***

Блаже се преоблекол во Славко

Еднаш Блаже се преоблекол во Славко, ставил маска и отишол на маскенбал во „Офицерскиот дом“. Таму му пришла убава дама, облечена како бајадера, и му подметнала белешка. Блаже ја прочитал и помислил: „Ако поракава е за мене, како Блаже, се прашувам што треба да сторам? Ако, пак, е за мене, како Славко, јас како чесен човек не смеам да ја искористам. А што ако поракава е само шега на едно младо суштество во потрага по внимание? Ма, нека оди во темничиштето пално!” И ја фрлил пораката во канта за ѓубре.

 Добро, кој ти го украде идентитетот?

***

Славко се преоблекол во Блаже

Еднаш Славко се преоблекол во Блаже и отишол на гости кај Георги Старделов. Љубезниот критичар и теоретичар понудил горчлив чај:

‒ Ќе ми верувате ли, Блаже, дома немам ни коцка шеќер. Пред малку Славко ми беше на гости и го изеде сиот шеќер.

Славко ништо не одговорил.

***

Славко на маскенбал

Еднаш Славко се преоблекол во Блаже, нафрлил на себе лавјо крзно, и отишол во „Офицерскиот дом“ на маскенбал.

Петре, веројатно пивнат, го видел човекот во лавјо крзно и викнал:

- Лага! Тоа е Гане Тодоровски! Измама! Тоа е Гане Тодоровски!

***

Славко размислувал

Славко си седел дома и размислувал: „Јас сум гениј, во ред. Блаже исто така е гениј. Ама и Иво Андриќ, лесна му земја, е гениј. За Крлежа да не зборам... Кога ќе се заврши ова?”

Тука завршило.

Крадач на идентитети. Ти?

Слики: Дејв Коверли