Америка (фрагмент)

Америко, ти всушност не сакаш да војуваш.
Америко, за сè се виновни злите Руси.
Русите, ах тие Руси и ах тие Кинези. Особено Русите.
Русија сака живи да нè изеде. Русија е луда по моќ.
Сака да ни ги украде автомобилите од гаражи.
Сака да го присвои Чикаго.
Нејзе ѝ треба Црвениот Ридерс Дајџест.
Сака да ги пресели нашите автомобилски фабрики во Сибир.
Сака нејзината огромна бирократија
да управува со нашите бензински пумпи.
Тоа никако не е добро. Фуј.
Таа би ги учела Индијанците да читаат.
Потребни ѝ се јаки црнчишта.
Аха. Таа би нè натерала сите да 'рмбаме
шеснаесет часа дневно. Помош!
Америко, ситуацијата е стварно сериозна.
Америко, имам таков впечаток додека гледам телевизија.
Америко, вистина ли е тоа?
Подобро веднаш да се фатам за работа.
Вистина е дека не сакам да одам во војска, ни да работам
на метален струг во фабрика за машински делови,
и онака сум кратковид и психопат.
Америко, одлучив да ти ја понудам својата педерска помош.

Превод: П. В.