Чунот на лудите

Според сликата на Хиеронимус Бош

По реката плови чун полн бегалци од лудница.
Чуварите, беспомошни, им се закануваат со пушките.
Од брегот ги следат деца, кучиња – цела глутница –
и еден ловокрадец што наѕирна од грмушките.

Го пресекле јажето што ги врзувало за брегот.
Некои држат говори, некои само се смеат.
Полегнати врз клупите како врз најмеко легло
занесено гледаат в небо, пијат вино, пеат.

Кон средина на реката струјата ги влече.
Ќе се разминат, мимолетно, со некој врбјак бушав.
Ене – веќе исчезнуваат зад свијокот речен.
Само уште нивната радосна песна се слуша.