Заев на ручек кај племето Басонго

ЗАНЗАБУКУ / СТРУМИЦА, 13 април 2011 (ЊУЗ/ОКНО) – Племето Басонго од Конго денеска му упати официјална покана на потпретседателот на СДСМ и градоначалник на Струмица Зоран Заев да учествува на нивниот традиционален ручек, кој ќе се одржи на 17 мај во срцето на џунглата Занзабуку во Конго.

Повикот уследи по објавувањето на изјавата на Заев, во која се потенцира дека СДСМ кога ќе дојде на власт ќе јаде живи луѓе.

Оваа изјава доби широк публицитет на овој континент, па, според реакциите на официјалните лица и здруженијата на африканските земји, го предизвика вниманието на племето Басонго, кое веќе со генерации практикува канибализам.

Во писмото, потпишано од поглавицата М’Зунга, меѓу останатото, се наведува дека Зоран Заев со својот настап повторно го привлекол вниманието на светската јавност врз канибализмот, а со самото тоа и врз проблемите на канибалите.

- Ситуацијата е алармантна, бидејќи во последните години во Африка има сè помалку туристи, како и заскитани туристи, кои би им обезбедиле редовни оброци на оние што својата исхрана ја базираат на овој извор на намирници – се вели во писмото.

Во поканата, исто така, е изразена надеж дека „господинот Заев ќе биде првиот македонски политичар што ќе присуствува на ручек кај ова племе. Претходната покана му беше упатена на премиерот Груевски, кој, иако сè беше подготвено за неговото доаѓање, пропушти да биде дел од оваа традиција, кога минатиот пат беше во посета на африканскиот континент“.

По овој повод Зоран Заев, за кого инаку се шпекулира дека ќе биде опозициски кандидат за премиер, по овој повод изјави дека е почествуван со поканата на поглавицата М’Зунга и со поддршката што африканските народи ја даваат на програмата на СДСМ и нему лично.

Потпретседателот на СДСМ изрази надеж дека гостопримството од М’зунга на најдобар начин ќе ги демантира критиките на поедини македонски политичари од власта што уследија по неговата изјава.

инспирација за текстот: http://www.njuz.net/pleme-africkih-ljudozdera-pozvalo-cedomira-jovanovica-na-rucak/