Мајкл Џексон бил Македонец

Познатиот штипски и светски историчар Александар Донски преку низа сложени математички пресметки, како и со помош на Американскиот државен архив, односно документите кои оваа американска национална установа љубезно му ги отстапи на проучување, откри дека најпознатата светска поп ѕвезда, која почина пред две години, Мајкл Џексон имал делумно македонско потекло. Имено, одредени корени од неговото семејно стебло досегаат дури до почвата на Македонија!

„На почетокот ни јас не можев да верувам во тоа, несомнено, светско откритие“, вели за Пара вестите штипскиот и семакедонски истражувач и историчар Донски, кој неодамна престојуваше во САД, стипендиран од Македонската фондација за откривање на корените која беше формирана во рамките на Министерството за култура, а е поддржана од многу познати имиња од политичкиот, културниот, деловниот, спортскиот и невработениот свет.

„Пребарувајќи низ американските архиви и документи, наидов на податок кој укажуваше на тоа дека еден од претците на Мајкл Џексон, Михаил Јаконов, кој се родил и пораснал во Битола, во 1882 г. пристигнал на територијата на денешен САД и таму се вработил во градежништвото и го сменил името за полесно да се вклопи во околината. Потоа се оженил за девојка со афроамериканско потекло, со која имал четири деца, од кои две починале. Од останатите две потекнува таткото на Мајкл кој, како што е познато, имал пет деца, меѓу кои едно посебно се истакнувало со белината на својата кожа – Мајкл Џексон“, вели Донски, покажувајќи му на вашиот известувач копии од оригиналните документи што се чуваат во специјалните сефови на Американскиот државен архив.

Донски вели дека планира да напише и книга за ова сензационално откритие, откако ќе ги докомплетира истражувањата и доказите кои одат во прилог на неговата теза. Исто така, за Пара вести изјави дека во САД грчките културни здруженија, откако дознале за оваа вест, веќе се мобилизирале и почнале да пишуваат писма до американските конгресмени во кои тврдат дека Македонија и македонската влада не само што бесрамно ја крадат грчката историја туку сега почнале и дрско да преземаат и од американската. Засега од американската амбасада нема никакви реакции, но оттаму најавија конференција за печатот, меѓутоа не прецизираа кога ќе се одржи.

На плоштадите од неколку поголеми американски градови спонтано почнаа да се собираат групи луѓе, претежно со афроамериканско потекло, и да протестираат, главно извикувајќи „Каде е таа Македонија што сака да краде од нас!“. Многумина од нив носеа географски карти на кои со црвена точка наводно е обележана Македонија, иако новинарите на Фокс њуз открија дека, сепак, се работи за пропуст и по грешка била обележана грчката провинција Македонија, на што повторно реагираа грчките културни здруженија и испратија неколку е-пораки со закани до македонските институции.

Семејството Џексон засега не го коментира најновиот развој на настаните, а нивниот адвокат за новинарите изјави дека можно е да ја тужат Република Маусдонија (подоцна се поправи и рече Македонија) пред Меѓународниот суд во Хаг, како и во окружниот суд во Лос Анџелес.

Инспирирано од веста дека Шакира имала делумно македонско потекло.