Охридеа, новата македонска фаланга

Гледав, со извесно задоцнување, слики на новиот терминал и тамам си помислив дека нешто модерно успеало да се пробие низ густата мрежа на ретроградниот кич во фантастичната метропола на онеправданите, кога, јок, море, најновите вести ме треснаа по тимбата со старозаветниот став дека не постои модерност што не може да биде усрана од интелектуалните, естетските и политичките празнења на најновата верзија на македонскиот човек.

Го бапнале, значи, клетите Турци, Сандрета наш, на ширината пред пултовите за чекирање и ја растуриле визуелната отвореност, широчината, слободноста и функционалноста на целиот простор. Како, да речеме, на министерот за транспорт да му инсталирале кула од гомна во дневната соба. Па да се бута Ми Лето да фати агол за да ги гледа на малиот екран говорите на саканиот водач Гр Уевс Ки, а жена му да инсистира заедно да уживаат во новиот елемент на семејниот интериер.

- Турците, драг мој Бранко, требаше да се вратат на Балканот како господари, а не како профитери – ме тешеше комшијата во Орешани. – Во однос на Александар Аеродромски и на Ми Лета Јанакиевски тие постапија како Методија Патчев во однос на некои истакнати комити: за една ракатка милиони ја предадоа модерноста на својата визија во Македонија.

Исеработката на Стефановска ќе се викала "Пилот на коњ", или "Воин на коњ на Аеродромот Свој" дознава "Глобус" од доверливи извори. Што е многу соодветно ако се знае дека Александар не бил полош пилот од другарот Путин со таа разлика што во тоа време, мислам на Александера, летале на коњи. Првата авиокомпанија ја формирал Филип, но се смета дека основоположник на модерната авијација е Александар. Тој прв успеал со коњ да прелета пет метри.

Каламарија Охридеа се генетски модификувани суштества кои врз зелената маса на флората дејствуваат како бактериите што ја разградуваат нафтата. Охридеата е полифазично животинче кое што ги уништува растенијата потемелно од киселите дождови и шумските пожари. Во форма на јајца, ларви и пеперутки го напаѓа фотосинтезискиот систем на билките и на тој начин ги деструира пострашно отколку што Внатрешната антимакедонска контрареволуционерна инсталација ја уништува Македонија. Како таква таа е погодна за субверзивни дејствија во непријателската заднина. Доволно е во косата на некоја дама (да речеме, во дражесната фризура на Лилето Поповска) да се пренесат два-три милиони охридејски јајца и да се смета дека битката, ако не и војната, се добиени.

Ме фасцинира патриотскиот текст во "Дневник" за македонските пеперутки кои прават ’ршум по светот. Се чини дека Лилето била на Елисејските полиња и дека трипати се протнала под Триумфалната капија на Наполеон вежбајќи го ритуалот за капијата на Груемон во Скопје. Тука се оставени јајцата на Охридеа кои сега пустошат по шумите и парковите на оние кои не не оставаат да си бидеме ненормални. И не тераат да им попуш(т)име на Грците.

Светот ќе се распадне затоа што е втемелен на искривени основи. Еве еден пример: еден монструм ( Башар Ел Асад) треба да убие две илјади луѓе за да биде замолен да ја демократизира државата (Медведев) или да ја напушти власта (Обама) што покажува дека ниту најголемите злосторства не можат да ја нарушат етикецијата на светското лицемерие. До тој степен што остануваат сосема по страна монструмите кои не убиваат со тенкови и топови туку со помош на То Мета А Џи Евски, на Г Орда На, на Ми Хајл О Та Маневски, на хичкоковскиот манијак од Министерството за финансии, на мускетарите на коруптивниот журнализам без задршки, стоката која плива во морето ослободено од ајкулите на конкуренцијата и на копното јаде бурек и говна, открива пирамиди и има црно на бело докази дека не кодошеле.

Соопштението на Хилари Клинтон, со крајно разумните укажувања за искривувањето на македонските перспективи, ќе го возбуди Гр Уевск Ки ако собраниските радијатори во меѓувреме доживеат оргазам пред секојдневните налети на Трај Ко Та. Посериозни повратни ефекти можат да се добијат ако државниот секретар на Соединетите Американски Држави разговара со фикусите во Стејт Депаретментот отколку со луѓето што се претставуваат како власт во Македонија. Ние, госпоѓо Клинтон, се соочуваме со демократска узурпација на власта од група чипирани идиоти. Тоа треба да се каже, а не дека судството не ни е добро и други очигледни вистини.

Прво беше соопштено дека балистичките ракети и антибалистичките проектили на македонската фаланга нема да се појават на Мастурбаторската парада на македонското достоинство што ќе се одржи на 8 септември затоа што влагалиштето на Триумфалната капија на поразите не е доволно широко да ги прими фалусоидните примероци на нашата безбедност, но дополнително се покажа дека решението е донесено откако меѓу широките народни маси почнало да се шушка дека командата врз балистичките ракети била во рацете на Али Ах Мети, а дека во коалиционите договори Никола Груевски не успеа да ја добие командата врз ракетите против балистите. Ах Мети не успеал да го убеди дека антибалистичките ракети не се ракети против балистите. Тоа ти е. Смрт на народот слобода на фашизмот.

Извор: globusmagazin.com.mk

Колажи: Андре Мека