Коњот и еднорогот - расчеречени

За Демиен Хирст, најбогатиот британски жив уметник, чии лик и дело често се мета на критиките, соодветна е народната поговорка „Зад добриот коњ голема прашина се крева“. Во контекст на неговите неодамна поставени скулптури „Legend“ (Легенда) и „Myth“ (Мит), поговорката е применлива во буквална смисла.

Имено, неговите дела, кои се изложени на имотот Chastworth house во Дербишири, прикажуваат крилест коњ и еднорог, мистични суштества чии пластично бели тела се дополу соголени, оставајќи ни го на увид она што се крие под нивната кожа, т.е. анатомијата на овие необични животни. Силно црвените мускули и бели коски на крилестиот коњ и еднорог се во силен контраст со невината белина на самите скулптури.

Секое од митските суштества е поставено на сопствен постамент, а се наместени така да гледаат еден во друг, додека внатрешноста, која им е отворена, се наоѓа од спротивната страна. Аспектот на фантазијата и мистичноста целосно е отстранет со буквално соголување (дерење) на половина од нивното тело. Како што објаснува самиот уметник: „Науката често ја приземјува религијата, а на овој начин митските суштества се изедначени со смртните коњи, и навидум се лишени од магијата која ја поврзуваме со нив“. Хирст заклучува дека понекогаш митовите треба да се уништат за да станат реални.

По уметничкото сецирање на човечкото тело, ликот на бремената Богородица, ангелот, но и свинските полутки, како и коњите од митологијата, Хирст продолжува со преиспитување на невозможното или невидливото, со разбивање на митовите, истовремено потенцирајќи ги подеднакво реакциите на јавноста и струката.

Делата се поставени во склоп на изложбата Beyond limits (Зад границите), која секоја годија се одржува во Честворт хаус.

Извор: pogledaj.to