ДПМ го распиша конкурсот „Старите!“

Друштвото на писатели на Македонија по осумдесет и шести пат го распишува конкурсот „Старите!“, за најдобар ветерански прозен ракопис на македонски јазик.

Наградата изнесува 10 000 евра, куќа на Водно, леење бронзен споменик на плоштадот Македонија и објавување книга во едицијата „Ореол“.

Спонзор на наградата е Фондот за култура на гостилницата „Јоле“.

Целта на наградата е да ги афирмира веќе докажаните автори во македонската книжевност, старите и веќе видени тенденции во литературата, истите поетички начела, истиот пристап, истиот начин на организирање во сферата на литературата, да ги охрабри долгогодишните заложби литературата да не стане влијателна (ниту медиумски ниту економски), како и да остане што е можно пооддалечена од читателот.

Наградата ќе се додели кон крајот на месец декември.

Услови на конкурсот: за наградата може да конкурираат исклучиво автори на возраст над седумдесет и пет години, со најмалку деветнаесет објавени книги. Должината на ракописот не е строго пропишана, но предност имаат ракописите чија должина изнесува повеќе од 315 страници во А4 формат (фонт 12, проред 1,5). Во ракописите не смее да се зборува за теми понови од 1950 година. Пожелно е јазикот да биде архаизиран, а тематиката националпатриотска или печалбарска.

Ракописите можете да ги испратите до 10 декември 2011 на следнава адреса:
Гостилница „Јоле“
ул. Максим Горки бр. 18
1000, Скопје

Или по електронска пошта на адресата: oreol@dpm.com.mk

Членови на жири комисијата се: Паскал Гилевски, Раде Силјан и Божин Павловски. По потреба, жирито ќе изврши консултации со духовите на Гане Тодоровски и Коле Чашуле.