Демократија по ДПМНЕ

Кога тргнав да го пишувам текстов, мислев дека анкетата за нова фасада на зградата на владата е завршена. Повеќе од 5 часа гласањето беше затворено, иако фактот дека „античкото“ решение сè  уште добива гласови (по 10, 20, па и повеќе одеднаш) навестуваше дека не е сè готово. 

За оние што не се подетално запознаени, еве како се одвиваше гласањето за фасада на владата досега.

Најпрво, анкетата беше хостирана кај странскиот провајдер EasyPolls кој што има вградени механизми за заштита од злоупотреби при гласањето. Гласањето започна, и набрзо „античкиот“ предлог се издвои напред, следен тесно од второто „модернистичко“ решение. Во меѓувреме, на Фејсбук и Твитер интернет заедницата се организираше да гласа за второто и третото (т.н. техно) решение и набрзо „античкото“ падна на второ (а за време на викендот и на трето) место. Во тој момент на страниците на Вечер се појави статија со коментар дека резултатите се нерегуларни поради тоа што имало луѓе кои се организирале да гласаат преку социјалните мрежи?! Мојот коментар на статијата дека во тоа нема ништо нерегуларно, нормално, не го објавија, така што би сакал тука јавно да ги прашам кој дел од нивната полиса за коментари беше прекршен? 

Ова беше ситуацијата во петокот, преку викендот државната администрација не работеше и првото решение речиси и да не доби гласови, така што во понеделник наутро второто и третото решение беа изедначени и водеа со околу 600 гласови разлика. Оваа предност се намалуваше полека во текот на денот, и некаде околу еден часот по полноќ резулатите беа следните:

• Решение 1 - 26% (4954 гласови)
• Решение 2 - 28% (5317 гласови)
• Решение 3 - 28% (5303 гласови)
• Решение 4 - 7% (1372 гласови)
• Решение 5 - 8% (1578 гласови)
• Не знам / Нема одговор - 3% (483 гласови)

Во тој момент се случи нешто чудно. Најпрво, линкот до анкетата го снема од vlada.mk, а самата анкета покажуваше порака дека е затворена. Триесетина минути подоцна, линкот се појави повторно и акетата продолжи да функционира, со истиот изглед и резултати, но овој пат хостирана на страниците на владата, каде што можат многу лесно да манипулираат со бројот на гласови и со тоа кој има право да гласа. Во текот на вторникот претпладне анкетата сè уште изгледаше дека се одвива повеќе или помалку регуларно, сè додека околу 14:30 не почнаа да се шират коментари дека гласањето е затворено. Никој не можеше да гласа, но сите можеа да ги гледаат резултатите, и за чудо, првото и петтото решение продолжуваа да добиваат гласови, и тоа не постепено, туку по многу наеднаш. Рецептот „затвори гласачко место, па полни кутии“ е добро познат, но некако е контрапродуктивен кога јавноста има увид во резулатите. Ваквата брутална нерегуларност траеше околу 5 часа, кога администраторите веројатно ја увидеа својата грешка и повторно го овозможија гласањето за широките маси.

TL;DR: Владата не може да прифати „нејзиниот“ предлог да изгуби, и се брука обидувајки се да го намести гласањето.