de:sonanz фестивал

de:sonanz е меѓународен фестивал за електронска музика, уметност и нови медиуми што Гете-институт Канцеларија за врски Скопје го организира во соработка со локални и регионални партнери во рамки на Германските недели 2009.

Овој петдневен музички и уметнички фестивал го доживува своето прво издание, а фокусот ќе биде ставен на електронската музика од Германија.
Електронската музика од Германија е позната насекаде во светот, па затоа воопшто не изненадува фактот што многу музичари и уметници во земјава ја црпат својата инспирација од германската сцена. Оттука, главната цел на de:sonanz е да се поттикне директниот контакт и размената меѓу германската и локалната сцена, како и да се иницира идна соработка, што ќе придонесе да се затвори празнината која со години постои на електронската музичка сцена.

Програмата на фестивалот ја сочинуваат аудио и видео работилници, видео-проекции, уметнички и документарни филмови, интерактивна мултумедијална уметност, настапи во живо, диџеј сетови кои опфаќаат иновативна денс музика и експериментални мултимедијални перформанси.

Фестивалот ќе се одржи од 29 септември до 3 октомври 2009 година на различни локации низ Скопје, и публиката ќе има можност во живо да ги проследи настапите на некои од најзначајните артисти од германската електронска сцена. Официјалното отворање ќе биде со проекција на документарниот филм Totally Wired која се совпаѓа со премиерата на ДВД-изданието на филмот и отворањето на втората продавница „Schneider’s Büro“ за која станува збор во филмот. Премиерно публиката ќе може да види специјална селекција на Pictoplasma анимациите и избор на видео-спотови од берлинскиот лејбл Morr music. Воедно, преку фестивалот и Скопје ќе биде дел од светската турнеја The Past – The Present – The Future на електронскиот пионир Alec Empire! Секако, за да биде потполна, во програмата се вклучени и настапи на најзначајните македонски и српски електронски артисти.

Покрај големата количина електронска музика и сите овие ексклузивни моменти на фестивалот ќе ве очекуваат и многу возбудливи изненадувања, дружење, едукација, дискусии, споделување искуства, визуелни доживувања, забава... кои ќе ги искусите овие 5 дена. Затоа, придружете ни се на првото издание на de:sonanz фестивалот!

Во продолжение можете да прочитате краток опис за секој од авторите што ќе настапат.

Димитар Додовски (aeronautique/diplomatik)
www.myspace.com/dimitardodovski

Продукцијата е една од главните активности на продуцентот, диџеј и графички дизајнер од Битола, Димитар Додовски, кој воедно е ко-основач на Re:peat platform - групација ангажирана во полето на новите медиуми и електронската музика. Неговата музика ја избегнува строгата дихотомија помеѓу детроитскиот и берлинскиот техно-звук и длабокиот даб микрохаус, но токму таму според некои генерални одредници може да се смести, обидувајќи се да најде баланс помеѓу клубското и интимното конзумирање. Во својот звук фокусот го става врз соничните текстури, повеќеслојноста, најразлични фрагменти и испреплетени лупови кои формираат комплексни акустични ентитети. Верува во внимателно спакуван експериментализам, прилагоден за радио, кој кратко и јасно ја пренесува пораката на уметникот. По неколку ремикси за различни нет лејблови ја издава траката Aluminium Bend за петтото издание на компилацијата Diaspora Cottage Industries која ја издава етаблираниот лејбл Neo Ouija, серијал кој е започнат уште од почетокот на декадата, а годинава ја започна со издавањето на Internal Affairs EP за нет лејблот Aeronautique. На својот настап на de:sonanz за прв пат ќе се претстави со сосема необична постава – електроника и тапани!

every kid on speed (discofake/diplomatik)
www.everykidonspeed.tk

Piece of Shh… (Belgradeyard Sound System)
www.myspace.com/pieceofshh

Piece of Shh.. е еден од поактивните белградски продуценти кој седум години работи во рамките на колективот Belgradeyard Sound System, како и со многу музичари кои се под силно влијание на интензивниот џез. Тој воедно е и еден од ретките млади домашни артисти со значаен број настапи надвор од земјата. Кога започна да го оди и сопствениот пат, неговиот звук го најде удобното место во minimal-meets-dub средината која истовремено е позната, но и нова. Прави ремикс за Sutekh, издава изданија за Earsugar (Берлин), Cosmic Sounds (Лондон), rx-tx (Љубљана) и Public Records (Сан Франциско), а ја дели сцената со пионерите како Digital Mystikz, MRK1, Loefah, The Bug и Modeselektor. Влијанието на даб звукот е доминантно уште во раните снимки, така што не е чудно што dubstep бранот, кој го претставуваа и во радио емисијата BGYSS додека уште беше во зачеток, го зафати и неговиот звук. Во последно време се почести се и настапите во живо, вклучувајќи ги Wilsonic festival во Краков, Refract во Белград, TodaysArt во Хаг, како и Clubtransmediale во Берлин. На својот настап во живо во Скопје ќе претстави материјал создаден последнава година.

DJ Moodswinger (Belgradeyard Sound System)
http://myspace.com/djmoodswinger

Настапува од 1998 г. како еден од основачите и членовите на колективот Belgradeyard Sound System. Од 2000 г. со Горан Симоноски ја ко-уредува еклектичната радио емисија со истото име, на култното радио B 92, од 2002 г. го води белградскиот фестивал Dis-patch, a од 2003-2007 г. е член на музичката група Belgradeyard. Во текот на последните 8 години се претставува со бројни диџеј-сетови на фестивали и клубови низ Европа, а во Белград со диџеј-тимот BGYSS имаше и неколку резидент вечери на кои промовираа и автори како DJ Food, Coldcut, Modeselektor, Sofa Surfers, Phon.O, Jamie Lidell, Kit Clayton, Manitoba, Herbaliser, Matthew Herbert, Tony Morley, Rechenzentrum, DJ Vadim, Jazzanova, Four Tet, Apparat и многу други. Сè уште трага по совршена журка, иако некои од нив беа одлични. Во своите сетови претставува винили од доменот на јамајканските изворни облици и деривати: dub, reggaae, dancehall, dubstep, soca, jungle, electro, grime, hip hop, dubtechno... а за оваа прилика својот сет ќе го ориентира во правец на по тврд техно звук, прилагодувајќи го на звукот на останатите артисти кој ќе настапат таа вечер.

Tarwater (morr music)
www.tarwater.de

Ако зборуваме за електронската музичка сцена по која Берлин беше познат во деведесетите, тогаш несомнено мора да ги споменеме Tarwater. Нивната приказна започнува во 1995 г., кога гитаристот/басист и програмер Бернд Јестрам (Bernd Jestram) и тапанарот и вокалист Роналд Липок (Ronald Lippok) се сретнуваат во еден источно германски панк бенд и почнуваат да снимаат заедно додека Липок сè уште работи со To Rococo Rot, а Јестрам работи во своето Bleibeil студио. Од тој момент двајцата добри пријатели од источно германската авангардна сцена ја споделуваат страста за импровизации и експериментирање со панк или краутрок стиловите. Под ова име снимаат неколку албуми со карактеристичен, претежно инструментален звук, етикетиран како пост-рок/електроника; малку повеќе органски и уште повеќе поп од звукот на To Rococo Rot, со доминантни краут влијанија. Има нешто извонредно контрадикторно во нивната музика. Составена е главно од звучни фрагменти, но сепак е сосема комплексна; сосема е непристрасна, a сепак привлечна; репетитивна, но сепак чудесно мелодична. На нивните последни изданија The Needle Was Travelling и Spider Smile има дури и неколку речиси old school гитарски песни. Заедно со нивните соработници Mouse On Mars, To Rococo Rot и Kreidler, Tarwater го креираат најавантуристичкиот звук кој доаѓа од Германија уште од славните денови на краутрокот. Во Скопје го претставуваат новиот материјал изработен за филм во комбинација со песни од старите албуми.

Jan Nemecek (traffica / norbu)
www.jannemecek.net
www.norbumusic.com

Јан Немечек се издвојува како еден од најинтересните млади артисти на клубската електронска сцена во Србија. Неколку години поминува работејќи амбиентална музика, како и на разни мултумедијални проекти. Во 2006 г. ги запознава Марко Настиќ и Марко Милосављевиќ кои ги поддржуваат неговите први чекори во техно и хаус музиката и со кои соработува во студио, но и “на терен” со свои настапи во живо. Така, настапува на Егзит, со неполни седумнаесет години, што го прави најмладиот артист во историјата на фестивалот. Истата година потпишува и ремикс на синглот U Are The Reason на Настиќ и го издава соло албумот Afterimage, а настапот на Егзит е објавен како специјално издание со списанието Yellow cab. Заедно со Данило Томиќ го основа и првиот српски нет-лејбл Norbu, каде под псевдонимот Kalope се осврнува на поексперименталната страна на електрониката, минимал и хаус звукот. 2008 г. издава 12" за Traffica Records, а наскоро, следуваат неколку други изданија и ремикси за Traffica Records и Recon Light. За разлика од многу диџеи и продуценти на локалната сцена, Јан повеќе сака да настапува во живо, презентирајќи го на тој начин развивањето на неговите траки на подиумот. Во Скопје ќе се претстави со сосема свеж даб техно материјал од својата последна продукција.

T.Raumschmiere DJ / shitkatapult, novamute / berlin, germany
www.t.raumschmiere.com
www.shitkatapult.com

T. Raumschmiere е името под кое настапува Марко Хаас (Marco Haas), анти-херој и одметник, кој го присвојува својот надреален прекар, позајмен од приказната The Dreamcops на Вилијам С. Бароус. Индастријал, панк рок и хардкор правците се неговата прва музичка ориентација, а подоцнежниот ексцентричен електро-панк звук во себе комбинира влијанија од рок до хип хоп, создавајќи на тој начин еден разигран, постапокалиптичен напад на сетилата, дефиниран со слоганот “Stay Anti“ кој станува негов животен стил. Уште од 1997 г. почнува да ја издава својата музика за Kompakt и Hefty, потоа и за лејблот кој сам го основа - Shitkatapult, а паралелно членува и во неговиот метал/панк бенд Crack Whore Society. Во 2002 г. речиси истовремено ги издава бруталниот албум The Great Rock 'n' Roll Swindle за Shitkatapult и експерименталниот манифест Anti за Hefty. Даниел Милер од дискографската куќа Mute откако го гледа на сцена му нуди снимање плоча за легендарниот техно лејбл Novamute и од таа соработка произлегува неговиот најприфатен албум Radio Blackout, каде гостуваат имиња како: електро кралицата Miss Kittin и заводната вокалистка MC Soom T. Во 2003 г. се обидува со нешто ново; формира бенд и за прв пат настапува и како пејач, или во случајов врескач. Во 2004 г. Т. Raumschmiere & Band настапува насекаде низ Европа, а во 2005 г. Blitzkrieg Pop излегува за Novamute, албум на кој го проширува музичкиот репертоар со апстрактни амбиентални звуци од неговата богата аналогна опрема, како и со рок и електронски поп песни со мелодии каде својот глас го позајмуваат Ellen Allien (Bpitchcontrol), Sandra Nasic (поранешна членка на Guano Apes), Judith Juillerat и Quasimodo Jones (двајцата од Shitkatapult). Тоа е мрачен минималистички епски техно албум кој најде многу приврзаници и во Aмерика. Неговите неверојатни настапи во живо станаа легендарни. Последниот албум I tank u излезе минатата година за Shitkatapult. Токму поради сето ова, вистинското T. Raumschmiere искуство се доживува во клуб, каде може да демонстрира што сè може еден човек да направи со неколку парчиња електронска опрема – било да ја допира нежно или да ја гази.

Alec Empire SOLO LIVE / eat your heart out, dhr / berlin, germany
www.alec-empire.com
www.digitalhardcore.com

Alec Empire е еден од артистите кои се најзначајни за изгледот на електронската музика денес. Човек со неверојатнo екстензивна издавачка историја. Музички револуционер кој стои зад авангардниот нојз-панк проект Atari Teenage Riot. Беспрекорен музичар кој во својата историја работи со неверојатно голем број артисти, единствениот продуцент кој прави ремикси за блуз легендата R.L. Burnside, Thurston Moore од Sonic Youth, Bjork, Rob Zombie, The Jon Spencer Blues Explosion, Slayer... ги дели турнеите со Rage Against The Machine, Wu-Tang Clan, Beck, Ministry, Nine Inch Nails... а свири заедно со Charlie Clouser од Nine Inch Nails, јапонскata нојз легенда Merzbow, Gabe Serbian од The Locust… Го основа лејблот Digital Hardcore, кој е типичен берлински лејбл кој ја одбележува експанзијата на rave сцената во средината на деведесеттите. Уживајќи во културната слобода која владее во градот по падот на Берлинскиот ѕид, лејблот се залага за музичка и политичка агенда спротивна на веќе воспоставената, притоа користејќи џангл и хардкор елементи со вграден панк став и покренувајќи на тој начин своевидно движење. Atari Teenage Riot е најзначајниот дигитал хардкор бенд, кој дури има и умерен комерцијален успех, но вистинското влијание што го врши може да се почувствува многу подалеку. Продукцијата на Alec Empire издадена за легендарните Force Inc. и Mille Plateaux, се смета за ремек дело на модерната експериментална електронска музика, прикажувајќи доза на звучна иновација која противречи на lo-fi естетиката која му се припишува во подоцнежниот период. По растурањето на Atari Teenage Riot повторно се враќа на концепцијата бенд, за да го претставува својот нов соло материјал, кога и го издава дуплиот албум Intelligence And Sacrifice. Но, Alec Empire е повеќе од сето ова, за што јасно говори и неговиот нов албум Shivers, кој заедно со Nic Endo ќе го претстави во Скопје како дел од турнејата The Past – The Present – The Future.
"Мојата музика ги води луѓето на места каде што никогаш порано не биле. Некои никогаш не се враќаат, а оние кои се вратиле се плашат повторно да го сторат тоа." - Alec Empire, септември 2001 г.

EINMUSIK LIVE (einmusika rec. ,italic, germany)
www.einmusik.com

Самуел Киндерман (Samuel Kindermann), текстописец и продуцент од Хамбург, член на електронскиот музички проект Einmusik, во 2001 г. почнува да настапува под псевдонимот Nicol. На почетокот на својата кариера како диџеј и продуцент Nicol се дружи со локалниот диџеј Bastian El Zohbi (aka Cranque) и неговиот партнер Pelle Buys заедно формирајќи го проектот Einmusik, кој ќе се прослави на меѓународната техно сцена. По една и пол годишна интензивна работа во студио, тимот наoѓa платформа за својата музика и издава за Italic, високо квалитетен техно лејбл од Келн. Ова е голема шанса и момците не можеа да посакаат подобар почеток и можност да ја пласираат својата музика низ вистинските канали. Дури нивното второ издание Jittery Heritage (Italic 044), ненадејно го привлече вниманието на меѓународната сцена и доживеа глобална слава. Летото 2004 г. ниедно клубско доживување не можеше да помине без таа трака која се вртеше буквално во секој подобар клуб. Набрзо следуваа ремикси, како и работата со Rocco Branco aka Dominik Eulberg, Coburn и Egoexpress, а и продукција за Jake. Во 2006 г. следува дебито во живо на Einmusik со масивен сет на Mayday фестивалот. По успехот од претходните години, Cranque и Pelle Buys исто така почнаа да се фокусираат на нивните сопствени проекти, па така секој тргнува по својот пат. Долго очекуваниот двоен деби албум De’ Medici излегува есента 2007 г. за Italic, составен од 20 траки кои се своевидно музичко резиме за последните 6 години, како и израз на влијанијата и развојот на звукот на Einmusik. Албумот ја потврди големата меѓународна репутација на Einmusik и неговата турнеја е еден од најзначајните настани за љубителите на квалитетниот денс звук. Во Скопје со настап во живо ќе го претстави својот сосема свеж звук, кој како нов материјал треба наскоро да се појави на долгосвиречко издание!

Pictoplasma: Characters in Motion
www.pictoplasma.com

Pictoplasma започнува како ентузијастички проект чија цел е да се промовираат живите и динамични карактери што извираат од умовите на денешните врвни уметници, без разлика дали притоа се работи за анимации, илустрации, графичка уметност или играчки. Оттогаш проектот има издадено неколку високо вреднувани компилации, вклучувајќи ги „Енциклопедијата на карактери“ ("The Character Encyclopaedia") и „Караткери во движење“ (“Characters in Motion”) кои прераснаа во сликовни библии во областа на дизајнот на карактери. Од 2004 г. проектот исто така организира и годишни конференции, фестивали и изложби на кои се среќаваат уметници од целиот свет и разговараат за карактерите во комерцијалната и галериската уметност. Проекцијата „Карактери во движење“ ("Characters in Motion") специјално селектирана за фестивалот de:sonanz ги прикажува врвните и најсвежи примери од новата генерација карактери, кои му го враќаат стилот на светот на анимациите.

ABLETON LIVE WORKSHOP: From scratch to track
www.ableton.com
www.dis-patch.com

Фестивалот Dis-patch и оваа година ја продолжува соработката со најуспешната светска компанија во доменот на музичкиот софтвер, Ableton од Берлин. По успешните работилници и конкурси промовирани од 2007 година во Белград, Ableton Live доаѓа и во Македонија преку соработката со премиерното издание на de:sonanz фестивалот, првото релевантно македонско случување од фестивалски формат од доменот на современата електронска мзуика.
Платформата "Live" веќе долги години е официјално најуспешниот комерцијален музички софтвер, истовремено комплетна платформа за студиска работа и за изведување во живо, и сè посигурно станува стандард во доменот на студиската музичка продукција, настапи во живо и снимање, DJ-инг, монтажа, дизајн на звук и пошироко. Од година во година, Ableton носи нови подобрувања и ја шири палетата на дополнителни апликации, додека интеграцијата со max/MSP средината со нетрпение се очекува и покренува вистинска мала револуција токму во моментот кога Ableton за прв пат официјално се претставува во Скопје.
Сите учесници ќе имаат задача во текот на работилницата да реализираат минијатурно дело или скица, а најуспешните ќе имаат прилика да освојат оригинални верзии на софтверските пакети кои ги доделува Ableton. На крајот на работилницата ќе се одржи презентација.

30.09.2009 г., 20 часот
Кинотека на Македонија

Документарен филм: Totally Wired (режија: Niamh Ahern, Ирска)
www.totallywired.tumblr.com
www.schneidersbuero.de

Totally Wired е дебитантски долгометражен филм на ирската режисерка Niamh Ahern, која живее и работи во Берлин. Користејќи го својот глас на аутсајдер во Берлин, таа ни ја претставува приказната на уште еден аутсајдер, Андреас Шнајдер и неговата единствена визија за аналогниот свет. Наспроти забрзаниот развој на дигиталната револуција, Андреас со сета сила се обидува да го одржи во живот аналогниот пристап и го посветува своето време на поврзување на електронските музичари и сродните пронаоѓачи. Ќе запознаеме “мали“ производители, човечки суштества кои стојат зад машините, многу често осамени поединци со навидум невозможна идеја, користејќи ја контролата на напонот и фреквенциите да им дадат душа на машините. Сè пошироката употреба на софтверот од една страна претставува финансиска закана за сите оние кои се вклучени во производството на хардвер/аналогни инструменти, но од друга страна сè поголем е фетишизмот кој аналгоните инструменти, често рачно изработени, го предизвикуваат кај клиентите – како кај музичарите кои веруваат во аналогниот звук, така и кај колекционерите за кои самиот дизајн на објектите претставува доволен извор на уживање.
Дитер Депфер, Кен Мекбет и Вова Цвејман се некои од изумителите кои се интервјуирани во овој филм, каде секој зборува за сопствената, единствена визија за своите машини. На другиот крај на интерфејсот запознаваме музичари кои за возврат сето свое време го посветуваат да ја извлечат таа иста душа, предизвикувајќи ја преку највозбудливата електронска музика која можете да ја чуете денес. Daniel Miller, Ricardo Villalobos, Cassy и Max Loderbauer, меѓу останатите го споделуваат своето мислење за Schneider's Büro и за иднината на аналогијата.

NIAMH AHERN

Родена е во Даблин, каде ги завршила студиите по комуникации на Градскиот универзитет (Dublin City University). Со својот дипломски 8mm филм ја започнала филмската кариера, фокусирајќи се на DV форматот. Како продуцент и режисер работела на повеќе проекти во големи тимови вклучувајќи го и BBC, но своето документарно деби 21 ден (21 Days) го направила сама во 2006 г. Филмот го прикажале повеќе од 20 членови на EBU (Европска радиодифузна унија), а истата година бил вклучен и во програмата на Њујоршкиот детски филмски фестивал. Наскоро се преселува во Берлин , каде продолжува да се занимава со новинарство. Како “аутсајдер“ во Берлин се обидува тамошните приказни да ги раскаже од поинаков агол, па филмот Totally Wired е токму една од нив.

Video screening: a map of morr music
www.morrmusic.com

Morr Music е независна издавачка куќа која ја започна својата работа во 1999 година во Берлин, а со текот на времето постепено стана референтен лејбл кога станува збор за електроника. Повеќето од артистите кои тука издаваат би можеле да ги сместиме во категориите electronic pop или dreampop, рефлектирајќи го личниот вкус на сопственикот на овој лејбл Томас Мор (Thomas Morr). Сепак овој crossover впечаток произлегува од хибридизацијата помеѓу електрониката, инди звукот или пак shoegaze влијанијата, за се ова на крај да резултира во кохезивна естетика очигледна во звучните и визуелните елементи на изданијата на овој лејбл. Генерално гледано, артистите на овој лејбл ги комбинираат овие елементи на начин кој може да се допадне и на pop, и на dance, па и на rock публиката подеднакво. Shoegazing влијанието е претставено преку развојот на поп-рок мелодиите вметнати под слоевите на ефектите, а сето ова се случува во моментот кога лаптопот станува новата гитара. Хармоничните елементи доминираат над шумовите, чиј ритмичен хаос понекогаш ги напушта потсвесните простори за да се сплоти со мелодичните делови. Во целост, имаме впечаток дека преовладува лесна и мирна меланхолија, на смирувачки спротивставености и напната опуштеност. На многу веб страни за музика каде што се рецензираат изданијата на Morr Music, новинарите во своите текстови се повикуваат на бендови како My Bloody Valentine, Cocteau Twins и Slowdive, а совршен показател на ова преклопување на стиловите е компилацијата Blue Skied an' Clear, која содржи преработки на песни на Slowdive во електронски поп манир со кој се карактеризира и поврзува Morr Music. Музиката е достојно спакувана во омотите и буклетите изработени од графичкиот уметник Јан Крузе кој покажува брилијантно разбирање за визуелизација на Morr чувството. Тој ги дизајнира мапите на Morr Music светот каде лесно може да се изгубите. Во оваа прилика ќе имаме можност да залутаме во дел од тој свет преку колекцијата на видео спотови на артистите на овој лејбл, селектрирана за оваа прилика.

Sven Hahne
www.svenhahne.de

Свен Хане е роден во 1978 г. во Карлсруе. Студирал информатика на универзитетот во Карлсруе и аудиовизуелни медиуми на Уметничката академија за медиуми во Келн. Неговата работа опфаќа широк дијапазон на дисциплини вклучувајќи realtime/nonrealtime видео, звучни инсталации, музика за филм, како и развој на сензори, кибернетика и експериментално истражување на мозокот. Денес Хане работи како графичар, видео-уметник, програмер, медиумски уметник, музички продуцент и изведувач. Со фокус на феноменот на фидбек процеси, Свен Хане секогаш има истражувачки пристап во неговите дела. Неговите дела биле изложувани во Центарот за уметност и медиумска технологија во Карлсруе, уметничката галерија Музернок во Будимпешта и во Милениумскиот центар во Пекинг. Во моментов работи на организирање на фестивал за интермедијална импровизација/композиција во Stadtgarten, Келн. Заедно со Матијас Мухе во 2004 г. тој ја основа уметничката платформа Фришцеле.

Александар Ников
www.camomillemusic.com

Александар Ников веќе подолго време се занимава со креирање на звучни пејсажи, атмосфери и емотивни доживувања. Неговата музика се базира врз создавање мелодии кои се производ на суптилна промена на репетитивни патерни, со истовремена тенденција да се задржи нивната основната информација. На тој начин постигнува морфирање на едноставни мелодии во множество од непрепознатливи и аморфни звуци, моќни, непробојни и незапирливи и нивно повторно рафинирање до кршливи мелодии. Втората карактеристика на неговиот звук е употребата на општи и препознатливи мотиви. Сместувајќи ги во за нив несвојствен концепт, раскажува приказна која што е очигледна и мистична во исто време. Меѓу позначајните соработки со други артисти е членувањето во групата KLO, соработката со Ване Костадинов (Vancheck KKost/Monospit/Disko Pigg), од која произлегува и изданието Resized space, и членувањето во групата Монотонс. Покрај музика за претставата „Близок град“ од Мариус Ивашкевичиус и две епизоди за радио арт проектот RADIA.fm за публиката достапно е едно самостојно издание (oo5 ep) за лејблот Camomille од Канада.

Martchin
www.myspace.com/martinonoff

Martchin започнува да се занимава со музика уште од неговата 7 годишна возраст кога посетува музичко училиште и свири виолина сѐ до неговата 15 година. Од 2003 година има радио емисија на Канал 103 и започнува да пушта electro, new wave и disco punk музика низ скопските клубови. Од 2006, дел е од OffPop, тим кој работи на презентирање и пуштање electro звук и култура, сите подвидови на electro, па сѐ до new wave/disco punk музика комбинирајќи и поврзувајќи ја музиката со уметност и експериментални филмови. Има настапувано во повеќе градови во земјава со свои резидент вечери. Музиката што ја пушта се движи од енергично тврдо electro, преку психоделично space disco, па сѐ до nеw wаve и techno...

visual workshop: live video with computer
www.svenhahne.de

Видеото или видео-артот, покрај тоа што претставуваат посебни уметнички форми, сѐ повеќе се присутни како дополнување на музички настани, било концерти, уметнички перформанси или диџеј-настапи, кои се практично незамисливи без визуелниот аспект. Таа комбинација е особено потенцирана во електронската експериментална сцена и на диџеј-настапите каде видеото буквално секогаш се комбинира со звучниот настап како надополнување на целокупното искуство. Во контекст на едукативниот дел на овој фестивал ќе се случи уште една работлница фокусирана на звукот и технологијата. Во рамките на оваа работилница предавачот Sven Hahne ќе даде вовед во софтверот Quartz Composer и преку негово користење ќе се покаже како се визуализира музика, како се создаваат апстрактни графики и како се трансформира веќе снимен видео-материјал. Програмата QuartzComposer на Apple содржи модуларен систем со кој се управува преку едноставен кориснички интерфејс. Со помош на оваа програма се објаснуваат основите на комјутерската графика и развивањето комплексни видео-ефекти. За време на работилницата учесниците ќе создаваат сопствени видео-ефекти кои на крајот ќе ги комбинираат во готови видео-клипови. Како појдовен материјал може да се користат фотографии, музика или вградената видео-камера на мекинтош-компјутерот. Работилницата е наменета за ученици од средните училишта .... на возраст од 15 до 18 години. На крајот од работилницата, готовите дела ќе бидат претставени преку соодветна презентација.