Слобода

На Денот на победата над фашизмот, потсетуваме на песната „Слобода“ од Пол Елијар. За време на фашистичката окупација на Франција, во 1941 тој се ангажира во Движењето на отпорот. Неговата збирка песни „Поезија и вистина“ (1942) во која се наоѓа и оваа песна, во илјадници примероци е фрлана од авионите на Сојузниците на територијата на окупирана Франција.

СЛОБОДА 

Врз моите ученички тетратки
Врз школската клупа и врз дрвјата
Врз песокта врз снегот
Ти го пишувам името

Врз сите непрочитани страници
Врз сите неиспишани страници
Врз каменот крвта хартијата или пепелта
Ти го пишувам името

Врз позлатените слики
Врз оружјето на воините
Врз круната на кралевите
Ти го пишувам името

Врз прашумата и пустината
Врз гнездата и врз грмушките
Врз одекот на детството
Ти го пишувам името

Врз чудесноста на ноќта
Врз белиот леб на деновите
Врз поврзаните годишни времиња
Ти го пишувам името

Врз сите парталчиња на синилото
Врз рибникот мувлосаното сонце
Врз езерото месечината жива
Ти го пишувам името

Врз полињата врз хоризонтот
Врз крилјата на птиците
И врз водениците на сенките
Ти го пишувам името

Врз секој здив на зората
Врз морето врз бродовите
Врз планината полудена
Ти го пишувам името

Врз мовта на облаците
Врз потта на луњата
Врз дождот густ и топол
Ти го пишувам името

Врз блескавите облици
Врз ѕвоната врз боите
Врз неспорната вистина
Ти го пишувам името

Врз разбудените патеки
Врз спрострените патишта
Врз преполните плоштади
Ти го пишувам името

Врз ламбата што се пали
Врз ламбата што се гаси
Врз куќите доближени
Ти го пишувам името

Врз мојата соба и огледалото
Врз тој плод расечен надве
Врз мојот кревет таа празна школка
Ти го пишувам името

Врз мојот пес алчен и питом
Врз неговите кренати уши
Врз неговите несмасни шепи
Ти го пишувам името

Врз портата што во свет ме фрла
Врз познатите предмети
Врз огнот што е благословен
Ти го пишувам името

Врз излогот на изненадите
Врз усните внимателни
Над молчењето поткренати
Ти го пишувам името

Врз засолништата разурнати
Врз светилниците соборени
Врз ѕидовите на моите грижи
Ти го пишувам името

Врз отсуството на желбите
Врз голата осаменост
Врз скалите на гибелта
Ти го пишувам името

Врз здравјето повратено
Врз исчезнатата опасност
Врз надежта без спомени
Ти го пишувам името

Со моќта на еден збор
Го почнувам одново животот
Јас сум роден за да те запознам
За да те именувам

Слободо.

Препев: Влада Урошевиќ
Сликa: Стјуарт Брејсвел