1014 hPa
82 %
10 °C
Скопје - Пет, 19.04.2024 09:59
Пионерски воз
Брз ко утрен сончев зрак
воз по шини мине пак...
Тик-та-рак!
Тик-та-рак!
Минуваат
села,
ниви,
гледај, гледај
бели стада,
онде цути мак!
Под оние ридја сини
некои луѓе куќа градат...
Ура! Тик-та-рак!
И за миг -
слика нова -
поминува река,
уште малку,
уште малку -
градот гости чека.
А во градот луѓе рој...
На задниот дрвен праг,
возу, стој...
- Здраво, граде, дојдов пак!
Тик-та-рак! Тик-та-рак!
Како итра птица летав
да стигнам пред мрак,
пионерска носев чета -
Ура! Тик-та-рак!
Ние бевме в цветно поле
од изгревот ран,
а во дружба со нас беше
денот разигран.
Весели сме
и весел сум
како вчера пак.
Со нив татнев, песна пеев...
Ура! Тик-та-рак!
Нхма-Кхма
Ова е Пигмејчето Нхма-Кхма,
голем три детски педи -
ако се собере малку
на дожд под печурка седи.
А што прави Нхма-Кхма
кога е гладен?
Јаде:
од дикобраз опаш со зелка,
кафе од мелени мравки,
кајгана од јајца на желка,
од носорог сало,
од жирафа уво
и лепче мало.
Мало - колкаво?
Олкаво:
триесет фурни го печат
и испечен
три слонови глутници го влечат.
А што пие Нхма-Кхма
кога е жеден?
Морски бран еден,
три езера, седум реки
и чашуле топло млеко.
А млекото какво е?
Какво е, такво е.
Во Конго чув
дека е од лилјак или од був.
Малата вештица
Опара,
опара,
сиот свет е попара.
Таков ќе е
каков бил,
но и таков ми е мил.
Овде еже,
онде змија,
светулчиња над нив в лет.
Вештица сум -
мала, среќна -
и го сакам овој свет.
Како се роди јапонска принцеза
Навистина, како?
Вака:
...Се меси пченкарен леб
во утрена роса.
Ете ѝ лице.
Две зрна ориз
под свилени реси.
Ете ѝ очи.
Од рана вишна
две румени капки.
Ете ѝ усни.
Во ракави бели
трепетливи зраци.
Ете ѝ раце.
Уште само ова -
во пазуви птица.
Ете ѝ срце.
Прекрасно, мајсторе.
Но, камо ѝ нозе?
Секој ги има.
Фати го ветрот
од некое море.
Ете ѝ нозе.
Под исто небо
премал е светов.
Близу е Јапонија.
А Македонија, каде е?
Цртежи: Владимир Лукаш
Во издание на Темплум штотуку излезе стихозбирката со најдобрите песни за деца на Славко Јаневски: Како така? Зошто така? Сè да знае светов сакал!
Други песни за деца од Јаневски на Окно: