Телеграмата на Груевски!

09.01.2015 02:43
Телеграмата на Груевски!

Независно од неподносливо баналниот тон во телеграмата (како да ја пишувал некој поштарски курир) на Груевски до францускиот премиер Велс, јас верувам дека зад изразите на сочувство стојат искрените чувства и потресеноста на македонскиот премиер од терористичкиот напад врз Редакцијата на „Шарли Ебдо“ во Париз и од жртвите што паднаа во тој безумен чин. А не трагикомичните парадерски импулси и спинови што на домашната сцена го водат во сè, последен пат во срамниот перформанс со професорите!

Општа европска и светска оценка е дека нападот врз сатиричниот весник е напад врз слободата на мислата и изразувањето како еден од клучните столбови на западната цивилизација. Во телеграмата на Груевски, тој аспект е покриен со ставот дека се нападнати „демократските вредности“!

Не случајно, зашто навистина би било премногу тој да изразува загриженост за напад врз слободата на мислата и изразот! Макар што и сите други „демократски вредности“ кај нас се уништени, но поводот е поконкретен! И во оваа прилика сакам да го потсетам премиерот дека тој лично го предводеше нападот на своите партиски единици во успешното уништување на „демократските вредности“, односно на слободата на мислата и говорот што беа нападнати во Париз! Симболиката на терористичкиот акт што се случи во Париз, во Македонија би била бесмислена, затоа што слободата тука веќе ја нема, таа е турната на маргините, по разно-разни портали за мастурбација на преживеаните новинари и уредници! Можеби кај нас физичките жртви и куршумите ќе дојдат покасно, но нема нормален човек кој нема заклучено дека физички преживеаните жртви на неговиот поход низ медиумскиот простор на Македонија и во овој момент се бројат, можеби, и на илјадници, дека нивните трауми се огромни (Кежаровски) и дека штетите се немерливи! Би било добро и од францускиот премиер да стигне некаква телеграма, ама не до Груевски, туку до луѓето во Македонија!

Фејсбук, 08.01.2015.
Слика: Свирачиња