Младински кино-клубови во организација на „Македокс“ и Младински образовен форум (МОФ)

19.03.2015 12:52
Младински кино-клубови во организација на „Македокс“ и Младински образовен форум (МОФ)

Во пресрет на најубавото годишно време, ги најавуваме Младинските кино-клубови на Фестивалот на креативен документарен филм „Македокс“. Заедно со МОФ, во следните седум месеци Младинските кино-клубови ќе заживеат во 12 градови низ земјата со 84 филмски проекции.

Ризницата на креативни документарни филмови се отвора за избистрување на умот и изострување на сетилото за убаво, со цел да се види и научи како е другде и да се децентрализира културата овде. Проектот се реализира во дебатните клубови на МОФ со цел да се подигне свесноста за човековите права со посредство на креативната документаристика. Циклусот започнува на 19 март во Неготино со проекција на документарниот филм „Алфабет“ на Ервин Вагенхофер.

Филмот „Алфабет“ (продукција Австрија/Германија, 2013) ја велича човековата имагинација, покажувајќи ни како ја губиме низ стандардизираниот образовен систем и како стануваме совршен потрошен материјал за современото вртоглаво општество заинтересирано единствено за мерливи резултати.

Филмските проекции се бесплатни и ќе се одржуваат еднаш месечно во: Неготино, Велес, Кичево, Дебар, Кратово, Битола, Куманово, Струга, Тетово, Делчево, Ресен, Гевгелија и во Скопје. Проектот е поддржан од National Endowment for Democracy – Вашингтон, САД.

Фестивалот на креативен документарен филм „Македокс“ е основан во Скопје во 2010 година со цел да ја претстави и промовира креативната документарна филмска уметност. Зачнат со ентузијазмот на една група на доку-љубители, „Македокс“ за само пет години успеа да прерасне во национална, регионална и светски етаблирана филмска манифестација со над 80 проекции годишно, придружена со изложби, дебати, работилници, мастер-класови и музички настани. Шестото издание на „Македокс“ ќе се одржи од 20 до 26 јуни 2015 година во Скопје.

Слични содржини

ОкоБоли главаВицФото