Парада на идиоти

Одам. А во пресрет
Ми доаѓаат идиоти
Идиоти брадести
Идиоти безбради
Идиоти сунѓерести
Идиоти големоусти
Идиоти аглести
Идиоти главести
Идиот - од уши му виси чеп од памук.

Доаѓа идиот весел
Доаѓа идиот тежок
Доаѓа идиот симпатичен
Доаѓа идиот апатичен
Доаѓа идиот нормален
Доаѓа идиот безобразен
Доаѓа идиот генијален
Доаѓа идиот епохален

Едни идиоти прилично облечени
Други послабо - неизбричени згужвани
Едни по римски замотани во весници
Други - во своите цртежи и пресметки
Некои својот срам го покриваат со платата
Некои со ерудицијата или занаетот

Голема среќа
Носат идиотите
Машини и дачи
Носат идиотите
Доаѓа идиот без мрморење
„Дали сум само јас несреќен
Жена ми - хистерик
Шефот- дебил
И јас неврастеник -
Се уништив себеси“

Доаѓаат идиоти влечат комбинати
Фабрики научни институти
Некакви реторти тркала ракети
Некакви книги скулптури нацрти
Носат фотографии од мртвата планета
И сосема невидливи предмети

Доаѓаат идиоти доаѓаат идиоти
Еве ги двајца истепаа некого
А други двајца средија некого
Некаков кепец и идиот

Чесни идиоти
Како лопати
Блескави идиоти
Како плакати
Идиотите воопшто се добри деца
И морничаво е да се биде меѓу нив
Идиотски песни пеат идиотите
Идиотски мисли мислат идиотите
И немаат поим и нема да знаат идиотите
Дека одеднаш ги замислиле идиоти

Доаѓаат трудољубиви доаѓаат дипломати
Доаѓаат колективи активи чети
И долж бесконечната ограда од цигли
Доаѓаат идиоти доаѓаат идиоти
Свири оркестарот „марш на идиотите“
Доаѓаат - и нема крај на смотрата на наказите
И помеѓу нив и самиот си идиот
Заробен од општиот вртлог
А можеби тоа е нормално? Природно?
Постои движење и цел и слобода?

Не се качуваа ли залудно на држачот на митралезите
И како есенски лисја паѓаа безброј...

И нека умрам и јас за идеалот на идиотите
Со блажена насмевка на идиот.

Превод: Иван Шопов
Слики: Truck Torrence

Хенрих Сапгир (1928-1999), руски поет, преведувач, сценарист, писател за деца. Ги објавил збирките песни „Добар ден!“, „Црвена топка“ (1970), „Четири коверти“ (1976), „Сонети на кошули“ (1989).