ВМРО-вско митингашење: никако без песна за „клетите Шиптари“

Додека Македонија се наоѓа во најсериозната политичка криза од нејзиното осамостојување, во време кога власта е компромитирана по секој можен основ, Никола Груевски го собира своето членство на контрамитинзи, контракампувања и други контрашки активности, само за да покаже масовност и компактност во партијата.

Меѓу најважните прашања чијшто одговор јавноста со нетрпение го очекува е тоа дали ДУИ ќе остане во коалиција со партнер кој во една од „бомбите“ што ги објави опозицијата зборува за „конечно расчистување со Шиптариштата“.

Подолу можете да погледнете видео од колона митингаши од ДПМНЕ кои се упатуваат кон митингот „Македонија силна“ на булеварот под стоковната куќа „Мост“ и со песна ги поздравуваат „клетите Шиптари“. Во позадина се слушаат извици „уа“ и негодување од Албанците и граѓаните од други етнички заедници кои во тој момент се наоѓаат во чаршијата.

Меѓу камп-чуварите на уставот пред Собранието можеби има и некој од овие песнопојци, кои посакуваат и работат на тоа Македонија да биде силна во фашизмот и нетолеранцијата, нешто во што и нивниот пастир не е без забележителни успеси.

Фотографија: Томислав Георгиев
Видео: Amon Mra