1005 hPa
48 %
15 °C
Скопје - Сре, 24.04.2024 20:59
Балканскиот „Галапагос“ под ризик
Заканата од уништување на Охридското Езеро со претерана урбанизација се најде на страниците на јулското издание на едно од најчитаните печатени списанија за див свет, „Би-би-си вајлдлајф магазин“.
Охридското Езеро е најстарото природно езеро во Европа и едно од најстарите природни езера во светот. Најголемата просечна длабочина му изнесува 155 метри, поради што е најдлабоко во Европа и 14-то најдлабоко езеро во светот. Со повеќе од 200 ендемични видови што живеат во неговите води, Охридското Езеро е најважниот езерски екосистем на европскиот континент.
И можеби токму поради овој податок, „Би-би-си вајлдлајф магазин“, како едно од наjрелевантните списанија за дивиот свет, во своето јулско издание објави статија за заканата од уништување на Охридското Езеро. Списанието се печати од 1963 година и оттогаш па наваму објавува стручни и проверени информации за дивиот свет кој ја населува планетата Земја.
„Балканскиот Галапагос е под закана. Дом на уникатни видови риби и полжави, Охридското Езеро, може да пресуши доколку се гради во неговото блато“, пишува во статијата.
Студенчишкото Блато е ризница на уникатна фауна, како и место за мрестење и гнездење на многу видови жив свет, кои го чинат уникатниот екосистем на Охридското Езеро.
Со новиот ГУП за Охрид 2014-2024 се планира блатото да се исуши за да се изградат луксузни апартмани, хотел и марина. Со намалувањето на површината на блатото ќе се променат квантитетот и квалитетот на подземните и површинските води, како и неговата основна функција, природен прочистувач на Охридското Езеро, што воедно е најсериозна закана по биолошката разновидност на блатото како и на самото езеро, алармира Охрид ЅОЅ.
Здружението информира дека во јуни годинава испратило отворено писмо до градоначалникот на Охрид, Никола Бакрачески, со барање за мораториум на спроведувањето на активностите/проектите што подразбираат намалување, односно преземање на Студенчишко Блато.
До денеска Охрид ЅОЅ нема добиено никаков одговор на барањето. Помислата дека Охрид и Македонија ќе останат без ова природно богатство е застрашувачка и неприфатлива како за македонската јавност, така и за меѓународната заедница, но изгледа не и за носителите на одлуки, кои сè уште веруваат дека со природата може да се пазари - велат активисти на Граѓанската иницијатива Охрид SOS.
Извор: Слободен печат