Приведено дете кај кое е пронајдена боенка

27.04.2016 10:39
Приведено дете кај кое е пронајдена боенка

Скопје, 27 април 2016

Полицијата го привела 6-годишниот Андреј С. од Скопје, кај кого била пронајдена боенка и повеќе комплети фломастери, дрвени боички и мрсни боички, соопштуваат од МВР.

Андреј се товари за нарушување на сивилото и црно-белиот свет на режимот, а полицијата во моментов ја истражува неговата поврзаност со странски служби и соработници.

„Лицето А.С., во присуство на неговите родители, беше одведено во полициска станица, а по извршениот распит му беше одредена мерка домашен притвор од осум дена“, соопшти Митко Чавков.

Тој објаснува дека ќе се покрене и постапка против неговите родители, кои се осомничени дека го помагале кривичното дело на својот 6-годишен син, така што му набавиле повеќе видови средства за боење.

„Деца, внимавајте со што си играте, имаме илјадници снимки од книжарниците и вашите домови“, ги предупреди Чавков потенцијалните идни престапници.

Малиот Андреј воопшто не е задоволен од тоа што ќе мора да остане дома осум дена, а најтешко му паѓа тоа што ќе го пропушти роденденот на својот другар Петар кој ќе биде прославен во една од скопските игротеки.

Андреј и родителите најавија тужба против државата и рекоа дека ќе одат до крај, сè додека правдата не биде задоволена, а нивното дете слободно да бои како што сака.